AMED - Hemsereka Pêroyî ya DBPyî Salîha Aydenîz, bale ante serê Yewîya Neteweyî û wina va: "Şarê Kurdî heta ewro hemverê îşxalkerdişan têkoşînêk bêhempa da. Labelê pêwa pêro têkoşînan nêeşkenê yewîya xo ya neteweyî awan bikerê. Seba nê hema zî hêrişan reyde rî bi rî manenê. Seba ke şarê Kurdî qirkerdişan ra xelas bibê, ganî yewîya xo bi ca bîyarê."

 

Serrê peyînan de partî û rêxistinê Kurdan seba yewîya neteweyî têkoşîn kenê. Bi taybetî zî bîyayîşê ke Herêma Federal a Kurdistanî de qewimyênê, Kurdistanijan kerd mîyanê endîşeyan. Hemsereka Pêroyî ya Partîya Herême ya Demokratîk (DBP) Salîha Aydenîz bale ante serê babeta Yewîya Neteweyî û erjnayîşê xo ma dir pare kerd.

 

'Pêro deskewtişê Kurdan hedef ameyê girewtene'

 

Salîha dîyar kerd ke pêro destkewtişê Kurdan hedef ameyê girewtene û va: "Ewro Şorişê Rojawanî seba şaran umîdêk pîl bi ca ard. Sewbîna xoserîya îdareyê Başûrî. Tewr peyîn zî kurdî dinya de bî aktorêk sîyasî. Seba nê sebebî ganî têkoşînê nê aktorê sîyasî biameyîne xilaskerdene. Bi no hawa  ewro dewleta tirkî ça de destkewtişê  kurdan bibo, hêrişê uca kena û îşxal kena. Coka ewro başûrê Kurdistanî de hêzê aye yê leşkerî bi ca bîyê. Ewro Efrîn de her roje îhlalkerdişê heqan, qetlîamê sivîl û wêrankerdiş yenê ciwîyayîş. Reyna hêrişê ke Girêspî û Serêkanî de yenê kerdene, vakurê Kurdistanî de zî bi polîtîkayê qeyûm hêrişî yenê kerdene. Pêwa nînan, hêzê hegemonî bi destê Tirkîya hewl dano ke heme destkewtişê kurdan çin bikero. Hedîseyê ke demê peyîn de yenê ciwîyayîş, na babete dir girêdaye yê. Hêrişê Zînê Wertê zî seba nê ame qewimnayene."

 

'Bi yewîye ma eşkenê hêrişan biqedênê'

 

Salîha, dîyar kerd ke seba ke şarê Kurdî xo qirkerdiş ra bixelisnê, ganî yewîya xo awan bikerê û va: "Şarê Kurdî heta ewro hemverê îşxalkerdoxan têkoşînêk pîl dayî. La pêwa pêro têkoşînan nêeşkenê yewîya xo ya neteweyî awan bikerê. Ma partîyêke ke bi serran o, seba yewîya neteweyî bi ca bêra, xebatan kenê. Têkilîyê ke Rojawan de mabêne PYNK û ENKS de virazya, seba yewîya neteweyî umîdêk pîl da şarî. Ewro provakasyonê ke Başûr de yenê ciwîyayîş, paşta ci de dewletê ke ma qal kenê estê. Ganî ma hemverê nê provakasyonan destkewtişê xo bipawê û seba ke mende bikerê amancê ma yo sereyîn yewîya neteweyî yo. Ma bi sûcdarkerdişê yewbînan xora bi serran vindî kerd. Çend rey destkewtişê ma seba ke yewîye bi ame xerckerdene."

 

'Ma do seba berjewendîyê şarê xo bêrê têhet' 

 

Salîha tewr peyîn wina va: "Ma serencamêk tarîxî de derbaz benê. Nê rastî de şarê Rojhelatê Mîyanên de binê teda dewletê îşxalkerdene de eşkenê serê bîyayîş û erjê xo yê hempar têkoşîn bikerê. Rewşa peyîn de hewceyê ke kurd bi qerar û têkoşîn mekanîzmayê ke serê kurdan yenê kerdene veng vejê. Şer û pêrodayîşê mîyanê kurdan de hesabê dewletê netewî yenê. Ganî şarê Kurdî bi nê hişmendî tê bigeyrê. Eke  bi nê berpirsyarî tênêgeyrê, ma do hemverê tarîx, komel û şarê xo de bêrê muhakemekerdene. Coka ganî ma problemanê xo bi dîyolag çareser bikerê."