Rojda Seyidxan

 

QAMIŞLO - Îdarekar û wendekarê şaristanê Qamişloyî waştişê ENKSî yê hemverê ziwanê kurdkî şermezar kerdî û wina vatî: "Ma sey mamoste û wendekarê Rojawanê waştişê ENKSyî qebûl nêkenê û ma do seba ziwanê dayîke her wext têkoşîn bikerê."

 

Demê peyîn de û mîyanê pêvînayîşê seba awankerdişê yewîya partîyê kurdî de, ENKSî qerar û waştişê xo dîyar keno û vano ke wa ziwanê kurdkî yê dayîke mekteban de nêro dayene û goreyê sîstem verê perwerde mekteban de bêro dayene. Derheqê na babete de îdarekar û wendekarê Mektebê Şehîd Suheyla ya Taxa Aşûrî ya şaristanê Qamişloyî şîrove kerdî.

 

'Ma do seba ziwanê dayîke her wext têkoşîn bikerê' 

 

Îdarekara Mektebê Amadeyî ya Şehîd Suheyla, Semer El- Hisên nêrazîbîyayîşê xo yê hemverê waştişê ENKSyî hemverê ziwanê kurdkî wina va: "Na serre de pêro branşê kurdkî ameyî amadekerdene û wendekaran dest bi wendişê serra newe kerdê. Verê şorişê Rojawanê Kurdistanî mektebê ma bi ziwanê erebî bî, la dimayê şorişê Rojawanê Kurdistanî ma dest bi musnayîşê ziwanê kurdkî kerd. Dima ra ser bi serre pêro branşê ma bî ziwanê Kurdkî. Roja ma ya ewro de heta unîversîte bi ziwanê kurdkî ameyê awankerdene. Goreyê waştişo tewr peyîn yê ENKSî ganî perwerde bi ziwanê Kurdkî nêro dayene. Ma sey mamoste û wendekarê Rojawanî waştişê ENKSyî qebûl nêkenê û ma do seba ziwanê dayîke her wext têkoşîn bikerê."

 

'Şorişê Rojawanî bi şorişê ziwanê dayîke dest pêkerd'

 

Semere dewam de win va: "Ma şorişê Rojawanî bi şorişê ziwanî dest pêkerd. Wexto ke ziwanê ma çin bo, tarîx û nasnameyê çin o. Ma ziwanê dayîka xo bi gonîya hezar pakrewanan qezenc kerd. Ma ziwanê xo nêdanê vurnayîşî. Ma vanê partîyê ke nê qerarî vetê vernî, wa bizanê ke qetî ma qeraranê înan ra nêtersenê û ma do bi ziwanê xo biwanê. Ma ziwanê xo nêvurnenê. Seba ke ziwan, ziwanê dayîke yo. Ma cinî ma do pawitişê ziwanê xo bikerê û ma do nesl bi nesl neql bikerê."

 

'Bi rayîrê wendişî ez o ziwanêxo bipawî'

 

Wendekara bi nameyê Cîhan Osê zî helwestê xo wina va: "Partîya ENKSî waştiş kerd ke ziwanê kurdkî mekteban de nîno dayene, labelê ma nê qebul nêkenê. Seba ke ziwanê Kurdkî ziwanê dayîke yo û heqê ma yo ke ma bi ziwanê xo biwanê, qisey bikerê û binusê. Ma her wext seba ziwanê xo têkoşîn bikerê û nêverdê kes ziwanê ma vinî bikero. Ez bi rayîrê wendişî ziwanê xo bipawî û xo ziwanê dayîke bikerî."