Medya Uren 

 

MÊRDÎN - Hemsereka SESî ya Mêrdîni Şukran Guzel, reaksîyon vera qerarê seba kedkaranê weşîye ameyê girewtene da û va: "Roja destpêk ra heta ewro selahîyetdarî goş nêdayî waştişanê ma. La qerarê sey betalkerdişê destûr û qedexeyê îstîfa girewtî. Kedkarê ke mecbûrê şert û mercê bîyaye de bixebityê psîkolojîyê înan xira bena."

 

Her ke şino hûmara kesê ke bi şubeyê vîrusê koronoyî kewtê zêde benê. No het ra baro tewr giran keweno serê milê kedkarê weşîye. Coka Wezaretê Weşîye yê Tirkîya eşkerayî da û va 27ê teşrîna verêne de neql kerd ke boydayîşê pêro kedkarê weşîye ameyê vindarneye û fekveradayîşê karmendan zî ame qedexekerdene. Reaksîyonê sendîka û karkerê weşîye hemverê nê qerarî zêde benê. Hemsereka Sendîkaya Kedkarê Weşîye (SES) ê Mêrdînî Şukrane Guzel derheqê qerarî de ajansê ma rê qalî kerd.

 

'Rewşa kedkarê weşîye tehlûke de ya'

 

Şukrane, destpêk de bale ante serê  kar û barê kedkarê weşîye û va: "Pandemî menga adare ra cuya ma de yo. A roje ra heta nika yê ke têkoşîn kenê û barê giran serê milê karkerê weşîyan de yo. Tirkîya de rewşa karkerê weşîye resayo tewr xirab. Kede û karê ma çin yeno hesibnayene, ma tehdîdan dir rî bi rî manenê. Eşkerayîya 27ê teşrîna verêne de ame neqlkerdene ke destûrê ma ameyê wedaritene û fek kar ra vera nêdê zî ameyê qedexekerdene. Xebatkarê weşîye fîzikî û psîkolojîkî problemê girîng ciwîyenê na rey rewşa înan kewena tehlûke."

 

'Waştişê ma tesdîq bikerê' 

 

Şukrane wina waştişanê xo ard ziwan: "Hûmarêk zêde hemrayê ma bi şube kewtê û xeylê înan zî dinyaya xo bedilnayî. Ma zî wazenê  korona seke nêweşîya meslegî bêro tesdîqkerdene. Vengdayîşê mi pêro selahîyetdaran rê, vengê ma bieşnawênê. Bi taybet zî ganî meaşê sereyîn bêrê zêde kerdene. Sewbîna ganî bi hawayêk sîstematîk seba embazê ma test bêro kerdene. Seba ke wina nêkenê, şube mîyanê xebatkaranê weşîye de vila beno."

 

'Tedbîrê xo bigîrê'

 

Şukrane tewr peyîn wina va: "Umîdê ma welatîyan esto ke nê prosesî de tewr bi dîqet bê. Bi ameyîşê zimistanî dir do şube tewr giran bo. Nê wextî de kesê ke serd bigîrê zî bi şikê korona muracatê nêweşxane kenê. O zî tesîr zêde keno. Ganî ma asayîşê xo biresnê tewr cor."