Medya Uren

 

MÊRDÎN - Vezîre Yilmaza 80 serrî pêwa emrê xo yê pîl, têkoşînê ciwîyayîşî dana. Vezîre, hinar û încîran arêdana û bazarê dewe de roşena wina va: "Lazim o cinî, camêrd, qij û pîl bimusê bi keda destê xo nan biwerê. Ma mecbûr ê seba cuye têkoşîn bidê."

 

Vezîre Yilmaz (80) ke dewa Stelîlî yê girêdayê qezaya Nisêbînê Mêrdînî ra ya, pêwa emr û nêweşîyanê xo, sebadebara xo bikera kedêk pîl û têkoşînêk pîl dana. Vezîre încîr, hinar û meşlûlê ke bi destê xo arêdayê û amade kerdê bi torbeyan dana paşta xo ro û ana bazar. Vezîre, bazaro ke her roje cayêk de yeno ronayene, bi ca bena û xidayanê xo roşena. Vezîre vana ke ganî her kes debara xo bi xo bikero.

 

'Ez ewnîyena xo ra û mêrdeyê xo ra'

 

Keda destan pîroz a, la keda destê mayêk 80 serrî nîna pêmawayene. Vezîre, bostanê xo bi xo ramito û pîl kerdo û nika berardişê ke bostan ra arêdana pê debara xo kena. Vezîre ma rê qalê xo ken aû vana ke kes ma wey nêkeno û coka ma mecbûrê xo wey bikerê û wina dewam kerde: "Ez û mêrdeyê xo ten aciwîyenê. Domanê ma dimayê zewicnayîşî ma ra visyayî. Ma wey nêkenê û xora mecbûr nîyê ma wey bikerê. Ez û mêrdeyê xo problemê weşîye ciwîyenê. O mi pîlêr ra yo û rewşa ey hîna xirab a. Ez hem ewnîyena ey ra û hem zî ewnîyena xo ra. Seba ma debara xo bikerê, ez her roje încîran û hinaran kom kena. Dewa ra ana merkez de roşena. Bi serran o ez nê karî kena. La pêwa rewşa mi zî û emrê mi zî ez reyna hewl dana ke serê lingan de bimana."

 

'Wa kes keye de nêşino ro'

 

Vezîre tewr peyîn wina qedêna: "Wext sey verê nîyo û merdimî zî sey verê nîyê. Ma şêrê verê berê kamî nan biwazê, do vejê bixebityê û qezenc bikerê. Ez zî vera ke keye de roşî teber de xebityena. Cinî beno camêrd beno, ferq nêkeno ganî merdim bixebityo û keda destê xo serê lingan de bimano. Kam mi vîneno vano ti çira xebityena. Xebat û debara xo kerdene, şerm nîya. Eke ez nêxebityî do kes ma wey nêkero. Tay, zaf ez bi nê rengî debara xo kena."