Medya Uren 

 

MÊRDÎN - Santralê Biyokutle yê Enerjî ke serra 2018 de Dêrik de ame ronayene, zirarêko pîl danê dewanê derûdorê xo. Seba nê zî mîyanê 3 serrî de bi hûmarêk zêde heywanî merdê, merdim û xoza zirar dîyê. Dewijê derûdorê santralî vatî, ganî bi lezgînî çareserîyêk bêro vînayene.

 

Qezaya Dêrikê Mêrdînî de serra 2018 de Santralê Biyokutle yê Enerjî ke aîdê Golobal Yatirim Holdingî aktîf o. Dimayê ke santral dest bi berardiş kerd; welatî, heywan û xozaya qeza zirarêk pîl santral ra dî. Citkar û welatîyê qeza ke bi pesdewarî dir eleqedar benê, dîyar kerdî ke bi hezaran heywanê înan telef bîyê û xoza sey verê nêgîna. Citkarê zîyanan ra Zarife Soylemez ke 10 serrî nê karî kena, vana ke ma citkarî zirar de yê û ma santralan serê erdê xo de nêwazenê.

 

'Nêweşîyê ke ma nêdîyê vejênê werte'

 

Zarife Soylemeza ke 10 serrî yo karê citkarî dir eleqedar bena û berardişê zeytûnan kena wina va: "Dêrik, cayêk dewlemend o û herra ci berardişê zêde dana. Tîya taybetî berardişê zeytûnan yeno kerdene û zeytûnê tewr weş ê. Ma bi serran o tîya zeytûnan arêdanê. Heta nika ma feydeyêk zêde zeytûnan girewtêne. La dimayê ke santral ame viraştene, ma tu feyde nêdî. Verê darêke ma 3 olçek zeytûn girewtêne la emsar ma tewr zêde olçekêk girewt. Yê ke ma gênê zî nîmeyê zaf xeipnaye yê û tehmê verê nêdanê. Ganeyê ke derûdorê santralî de ciwîyenê, temamê ci, ci ra tesîr benê. Vurnayîşê bi nê rengî yê pîlî ameyê. Xeylê nêweşî daran de ameyê meydan û benê sebebê xirabîyayîşî. Muhendisan zî nê daran rê derman peyda nêkerd û coka ma êdî bi karê ke kenê. Ma tîya santralan nêwazenê."

 

'Eke pesdewarî nêkerî ez bi çi debara xo bikerî'

 

Newroz Erdem zî hemverê santralî reaksîyon ramojna û va: "Çar mangayî mi bî û 3 mangayî mi merdî. Sebebê nê zî santralo ke qeza de ameyo viraştine yo. Eke ez tîya pesdewarî û ramitiş nêkerî, ez o senîn debara xo bikerî. Debara ma serî nê karî de ya. Hewayê lêşin ra tena heywan û zergûnayî ney, merdiman de zî nêweşî peyda bena. Wa santralê ke estê betal bikerê û ê newe zî nêvirazê."

 

'Weşîya ma kenê xeter'

 

Nerîman Aslan zî dîyar kerd ke heywanê înan zî telef benê û va: "Verê ke no santral bêro viraştene, ne nêweşî estbî, ne zî zirar ma dîne. Ma serê herra xo de bî û cuya ma bi weşî derbaz bîne. La nika rewşe wina nîya. Ma nêzanê do heta key wina dewam bikero. Çend serrê bîn derbaz bibê ne ma ne zî heywanê ma do bieşkê hawayêk baş tîya biciwîyê. Ma santralan nêwazenê."