Medya Uren 

 

MÊRDÎN - Mêrdîn de demê arêdayîşê fistiqan dest pêkerd û cinîyan verê xo da zîyanan. Arêdayîş ra heta rotişê fistiqan cinî kedêke pîl danê.

 

Herra Mêrdînî hetê ramitiş de xeylêk tewir zergûnayî û darê sey zeytun, simaq, fistiq, goze û sewbîna resenê. Mêrdîno ke debara xo bi citkarî û bazirganîyê xo keno, ver bi mewsîmê payîze reyde dest bi karkerîya dehl, rez û baxçeyê xo yê fistiqan kenê. Cinîyê ke tewr zêde demê xo bi kedkarîya zîyanan reyde derbaz kenê bi kedêke pîl înan erjnenê û roşenê.

 

'Ma verêsîya ci û berardişê ci ra feyde gênê'

 

Seyro Abikana ke pêwa ke emrê ci 75 serrî yo, aye hema zî bi karê arêdayîşê fistiqan dir eleqedar bena. Seyroye vana ke ez debara xo wina kena û wina qal kerd: "Ma nê daranê xo yê fistiqan û rezê xo verê çend serrî ramitê. Nika ma verêsîya înan û berardişê înan ra feyde gênê. Fistiqê ma bittim ê ke no zî tewirêk ê fistiqan o û her serre bi bereket nîyo. La emsar serra ci ya û ma zî seba arêdayîşî ameyê. Xora ma bi ameyîşê mewsîmê payîzî reyde karkerîya ma dest pêkena. Bi taybet zî ma sey cinî karo giran keweno serê milê ma. Ma fistiqanê xo arêdanê. Sewbîna zî ma seba zimistanî xeylêk karê bînan zî kenê. Bi taybet demê viraştişê bastiqan o zî."

 

'Fistiqî çar serrî ra reyke baş yenê'

 

Etkîn Abîkan zî wina qalê viraştişê fistiqan kerd: "Demo ke ma fistiqan arêdanê û dima ra ma hemine şûnê, sole kenê û danê verê tîjî. Ma dima ra zî kenê torbeyan, mengêk yan zî di mengî wina verdenê û dima ra zî roşenê. Mêrdîn, çend herrêke dewlemend bo zî la fistiqî zehmet virazênê. Eke virazîyenê zî tay gênê. Yan zî çar serre ra reyke baş yenê û emsar zî serra înan baş a. La reyna zî fistiqê ke ma arêdayê tay ê."

 

Etkîne dewam de bale ante serê keda ke danê û wina va: "Karêko zaf kede wazeno yo. Darê ci pîl ê û goreyê ci zî ma tehlîye benê. Fistiqê ke ma viraştê, ma roşenê yan zî seba zimistanî depo kenê. Ma bi nê rengî debara xo kenê.