ÎZMÎR - Hatîce Çoruk, dîyar kerd ke rîskê antişê Pêameyîşê Stenbolî ya Tirkîya her dem esto û va, hemverê nê cepheyo hempar ganî bêro awankerdene.

 

Tirkîya kewte mîyanê hewldayîşê ke Pêameyîşê Stenbolî ra xo bianca.  Coka cinîyan vera nê reaksîyon ramojna û AKPyî peyser game eşt. Cinîyan zî hemverê îhtimalo ke reyna antiş bêro rojeve Koma Kampanyaya ya Pêameyîşê Stenbolî awan kerdî. Endamê kome û eynî wextî de endama Keyeyê Paştdayîşî û Kulturî ya Cinîyan ya Buca Evka-1 (BEKEV) Hatice Çoruk, derheqê babete de qisey kerd.

 

‘Ma do taqîbkerdoxê caardişê pêameyîşî bê’

 

Hatîce dîyar kerd ke hukmat hêrişê Pêameyîşê Stenbolî keno û va: “Xeylê cinî ameyî qetilkerdene, xeylê kesî zî cinsperestî ra ameyî cîyakerdiş, xeylê domanî ameyî îstismarkerdene. Nê îhlalkerdişê heqan hema zî dewam kenê. Wextê Pêameyîşê Stenbolî kewt rojevê MYKyî, ma sey tevgerê têkoşînî ameyî têhet. Ma vanê wa Pêameyîşê Stenbolî bi ca bêro. Ma do taqîbkerdoxê nê çî bê.”

 

‘Beno ke dewlete wazena berpirsîyarîyê xo ra agêra’

 

Hatîce va, beno ke dewlete wazena berpirsiyarîyê xo agêra û wina dewam kerd: “Her çiqas meclîs bê mana ameyo verdayîş zî la eşkenê şewêk de na babete bîyarê rojeve û derbaz bikerê. Xora dewletêke berpirsiyarîyê zêdebîyayîşê qirkerdişê cinîyan nêgîro serê xo eşkena ke nê berpirsîyarî nêgîra serê xo.”

 

‘Ganî cinî pêameyîş bida naskerdene’

 

Hatice bale ant serê naskerdişê Pêameyîşê Stenbolî û wina va: “Wa pêameyîş bi vatişê 'pêameyîş şeytan keyeyê merdiman xirab keno’ ê hîn kesê ke qaşo rojnameger ê nêrê rojeve. Wa cinî nê çî kesê wina nêeşnawê. Ganî cinî pêameyîş bidê naskerdene. Ma do tena ney, ma do têkoşînê xo bi wayanê xo reyde dewam bikerê.”