Medya Uren 

 

Welatîyê taxa Îstasyonî yê ke girêdayê qezaya Artuklîyê Mêrdînî de ciwîyenê, hemverê qeyûman gerrekerdox ê. Bi taybetî zî her wext qapaxê qanalan akerde yo û boya gemarî taxe rê vila bena. Sewbîna çopê bîyaye bi rojan erd de manenê û nînê arêdayîş. Welatîyê taxe reaksîyon hemverê rewşe dayî û vatî bi tu hawa taxe rê xizmet nêkenê.

 

‘Ma pêro bi nêweşîya kolera kewtê’

 

Nofa Çelîk, taxa Îstasyonî de ciwîyena û dîyar kerd ke her wext qepaxê kanalî şikinê û va: "Ma her wext bi eynî problemî reyde rî bi rî manenê. Seba çareserî ma şaredarî geyrenê. Yenê çîyêk nêkenê û şinê, xeylê rey zî goş nêdanê probleman zî. Seba boya ke vila bena, ma nêeşkenê awanîyanê xo de biciwîyê. Sewbîna domanî zî mecbûr mîyanê gemarî de kay kenê. Seba sebebê gemarî û lêşinî ma bi nêweşîya kolera kewtî.”

 

‘Awa lêşine kewena mîyanê keyeyanê ma’ 

 

Nofa, dîyar kerd ke bi ameyîşê zimistanî reyde rewşa înan hîna xirab bena û wina va: "Bi zimistanî dir awe zêde bena û awa lêşine ke vilayê derûdorî bena zêdeyêr bena. Nika varan çin o. Na awa lêşin kewena zereyê keyeyê ma zî. Bi mengan o na rewşe wina dewam kena. Nê çî seba xizmetê qeyûmî yenê meydan.”

 

‘Taxa ma rê xizmet nêkenê’

 

Nofa tewr peyîn qiseykerdişê xo bale ant serê xizmetê şaredarî û va: "Werrekna problemê ma tena qenal bibayîne, teberê ci de xeylê problemê ma yê sereyîn estê û nînê çareserkerdene. Çopê ma bi rojan maneno û nîno arêdayîş. Seba ke çop nîno komkerdiş boyêk xirab keweno taxe. Ma xizmetêk wazenê û şaredarî xizmet nêkena. Sewbîna xizmetê ke taxê bînan rê yenê kerdene, taxe ma rê nêkenê. Rewşa taxa ma rewş nîya. No zî xemê kesî de nîyo. Seba boye û gemarî ma nêeşkenê taxe de biciwîyê.”