Rojda Aydin 

 

ŞIRNEX - Koçerî bi peynîbîyayîşê payîzî dir verê xo dayî keyeyê xo. Hamnanî amadekarîyê zimistanî kenê û zimistanî zî  amadekarîyê şîyayîşê xo yê zozanan kenê. Seba koçeran ciwîyayîş bi no metod dewam keno. Koçerê bi nameyê Rihan û Zeynepe bi serran o zozanan de bêrîvanî kenê û vatî: "Pêwa cuya zehmet ê zozanan, cuya mîyanê xozayî her wext weş a. Ma mîyanê zehmetî de berardiş kenê.”

 

Peynîya payîzî de êdî koçerî verê xo danê ca û wareyê xo. Hîkayeya koçerî peynîya wisarî de destpê kena. Hamnanî seba zimistanî amadekarî kenê û zimistanî zî seba şîyayîşê xo yê zozanan amadekarî kenê. Na xebate û berardiş heme bi keda cinîyan yena meydan. Rihan Denker û Zeynep Ekîncî her serre şinê zozanan û her di cinî ajansê ma rê qalê kar û barê xo kerdî.

 

Rihane Denker (65), zozanê Girê Hesen ê qezaya Şubeyê Wanî ameya. Rihane, dîyar kerd ke aye menga nîsane de verê xo dayê zozanan û wina va: “Ma vernîya pesê xo şinê zozanan, tîya amadekarîyan kenê û çadiran danê ro. Sewbîna ardişê ma yê pesî yê zozanan mengêk dewam keno. Bêrivanîyê ma zozanan de destpê keno. Ma serê sibayî rew aya benê û ma şinê pesê xo ancenê. Ma şitê xo anê kenê mast û penîr. Ma roje de di rey pesê xo ancenê û dima ra zî şivan pes benê çêrinenê.”

 

Dest bi amadekarîyê zimistanî kenê

 

Rihane, dîyar kerd ke nika amedekarîyê zimistanî kenê û wina va: "Wextê ke beno payîz ma verê xo danê Hezexî. Wextê zozanan yenê kenê, ma dest bi amadekarîyê zimistanî kenê. Ma cinî kom benê û yenê çadirê ke zirar vînenê ma derznenê. Sewbîna ma zimistanî zî amadekarîyê serra bêro zî kenê. Wextê ma her wext bi xebate reyde derbaz beno. Heto bîn ra ma her çîyê xo bi xo viraznenê. Sey tûrîk, kulav, kindir, pûncî û ûsn. ma viraznenê. Viraştişê înan zehmet o la ciwîyayîş de çîyêk zehmet nêbo çin o. Kesê koçer qetî nê çîyan viraznenê.”

 

‘Cuya ma her wext mîyanê xoza de derbaz bena’

 

Zeynep Ekîncî (35) zozananê Feraşînî ra ameya û domanîya aye her wext koçerî derbaz bîyo. Zeynepe wina va: "Cuya koçerî zaf zehmet o. Labelê zozanî û koyî zaf weş ê. Ma her wext bi xoza reyde cuyenê. Tîya merdimî xeylê çîyan musenê. Ya rastî zî deşte de ciwîyayîş weş nîyo. Verê mayî û pîrê ma koçerî kerdê û ma zî sey mîrasêk vînenê. Coka ma ewro kulturê koçerî dewam keno. Ma koyanê xo ra hes kenê. Domanê ma her wext mîyanê xoza de ciwîyenê û pîl benê. Cuya koçerî her çend zehmet bo zî hende zî weş a. Sewbîna ma xo pêro nêweşîyan ra pawenê. Ma zêde nêşinê nêweşxaneyan. Ma dermananê xo bi çîyê xozayî viraznenê. Cuya koçerî do her wext gane bimano.”