STENBOL - Cinîyan dîyar kerd ke heta muqaşeyê serê Peameyîşê Stenbolî biqedênê ê do micadeleyê xo dewam bikerê û vengdayîşê hempar ê meclisî kerdî.

 

Reaksîyonê cinîyan ê hemverê munaqeşeyê AKP û MHPyî serê antişê Pêameyîşê Stenbolî dewam keno. Cinîyan wareyan de çalakîyê ke organîze kerdî, pawitişê heqanê xo her ware de qîrenê û wazenê.

 

Cinîyan veng da Meclisê Enqere ke dimayê 65 rojan 1ê teşrîna verêne de ame akerdene û cinîyê parlamenterî waştî ke seba Pêameyîşê Stenbolî bêrê caardişî înan dir micadeleyê hempar bidê.

 

‘Ganî meclîs wezîfeyê xo bi ca bîyaro’

 

Meclisê Cinîyan ra Aşkin Koç, va ke hemverê şîdetê serê cinîyan dadgehe ceza kerdoxan rê nêdana û şîdetê ke yeno kerdene nêvînena. Aşkine dîyar kerd ke hukmat vatişê "keyeyî" cuya cinîyan ra tewr girîng vîneno û do hemverê nê micadeleyê xo dewam bikerê. Aşkine wina va: "Heta ke polîtîkayê bêcezaverdayîşî dewre de bê do şîdet zî zêde bo. Ma wazenê ke cinî bêters biciwîyê, azad bieşkê vejîyê teber û qisey bikerê. Wa cinî bi sebebê cîya cîya nêrê kiştene. Seba nê zî lazimî bi vindertişê meclisî zî esto. Ganî na babete bikewa rojeva meclisî."

 

‘Wa polîtîkayê asayîşî û pawitişî aver berê’

 

Meclisê Cinîyan Handenur Dayica, ard vîr ke hetê dewleta-camêrd nê hêrişê destkewtişê cinîyan yeno kerdene û wina va: “Vatişo ke ma vajê esto. Ma sere de pabeyê meclisî ke qanûnê Komîsyonê Cinî - Camêrd ê têduştîyê firsendî ameyo vindertene bîyarê rojeve. Ganî meclis seba Pêameyîşê Stenbolî bernameyê bêrê caardene amade bikero û seba cinî, doman û kesê ke mîyanê komelî de nêeşeknê xo bipawê polîtîkayê pawitişî aver bero.”

 

‘Ganî ma micadeleyê hempar de bêrê têhet’

 

Meclisê Cinîyan ra Nazlican Arslan zî va ke ê eywanê edliye de edalet geyrenê û va: "Ma edaleto rastîn wazenê. Ma wazenê ke cinî nêrê kiştene, pîya kuçe û keyeyê xo de asayîş de bê. Ma nê prosesî de hîn destkewtişî kerdî xo dest. Pêameyîşê Stenbolî destê ma de esto. Se beno wa bibo ma fek destkewtişê xo ra vera nêdanê. Problemê ma oyo ke pêameyîşo ke aktîf nîyo hîna aktîf bikerê. Nê sîstemî de heme kes, sazgeh û dezgehî ma reyde rayîra şêrê û micadeleyo hempar de kîşte ma de bê.