AMED - Hemsereka HDPyî ya Sûrî Hatûn Yildiz, dîyar kerd ke hemverê teda, zordarî, destbendkerdene û tepiştene do tewr zêde micadeleyê xo girs bikerê û hêzê cinîyan xurt bikerê.

 

29ê hezîrane de endamê Komeleya Cinîyan a Rosa û endamê Partîya Demokratîke ya Şaran (HDP) bi temamî 23 kesî ameybî destbendkerdene. Mîyanê nê 23 kesan de hemsereka HDPyî ya Sûrî yê Amedî Hatûne Yildiz zî estbî. Hatûne 13ê teşrîna verêne de roniştişê yewin de serbest ameye veradayene. Hatûne ajansê ma rê qalê prosesê destbendkerdişî kerd.

 

Hatûne destpêkê qiseykerdişê xo de bale ant serê hêrişê hemverê cinîyanê kurdan û va: "Dadgehe serê dosyaya ma nimte dabî ro, coka mi muhtewayê dosyaya xo nêzanayîne. Tena dosyaya Komeleya Cinîyan a Rosa ameyîne zanayene. Xêrcê nê kesêk muhtewayê dosya xo nêzanayîne. 4 îdîayê zûrî ardîbî vernîya ma û waştêne ke ma îmza bikerê. La ma baş zanenê ke cinîyan dişmin hesibnenê. Waştî ke vernîya ma bigîrê û hêzê ma çinbikerê.”

 

‘Waştî ma ajantî bikerê’

 

Hatûne arde ziwan ke destbendkerdişî de ajantî pêşnîyaze kerdî û wina va: “Ma amancê înan zanayîne û ma hemverê înan vejîyayî. Ma zîndan de mîyanê tecrîd de bî. Heme hal û tevgerê ma ameyîne taqîbkerdene. Seba ke ma îfade nêda dosyayanê ma girewtî û seba ke ma nêzanayîne îdia çî yê. Nêzdîyê 30 persî mi ra pers kerdî û ez 3 saete û nîm zere de menda. Bi taybetî persê derheqê Rosa de ameyî perskerdene. Grevê vêşanîye û roportajê ke mi dayê çapemenîye ameyî perskerdene.”

 

‘Cinî vernîya her çî de vindenê’

 

Hatûne dîyar kerd ke do xebatanê xo hîna zêde bikerê û va: "Vindertişê ma do hîna bi hêz û bi quwet bo. Tersê ma înan rê çin o. Ma peyser game nêerzenê. Ma verê zî xebate kerdêne la nika ma do hîna zêde xebatanê xo girs bikerê. Ma sere nêtewênenê. Wexto ke cinîyê kurdî û cinîyê Tirkîya hemverê polîtîkayê dewlete yê hemverê cinîyan vejîyayî û ameyî têhet, mîyanê îqtîdarî de tersêk virazya. Bi no hawa hêzê cinîyan biqedênê.”

 

‘Bi kamerayan kewtêne wareyê ma yê mahremîyetî’

 

Hatûne tewr peyîn qiseykerdişê xo de bale ant serê şert û mercê zîndanî û wina va: “Zîndanan de bi kamereyan 24 saetan zereyê hewş û banyo yeno taqîbkerdene. Ma zaf aciz bîne. Kewtêne wareyê ma yê mahremîyetî. O çî nîno qebulkerdene û ganî hemverê nê veng vejê.”