RIHA - Mayanê Aştîye ke 10 rojî TEM de tepişte mendî, dîyar kerdî ke hêrişê serê mayan newe nîyo û vatî: “Hêrişê serê mayan reyde tu netîce nêgîrê. Tu kes nêeşkeno mayan xebate ra dûr bifîno û aştîye ra bivisno. Ma do her wext seba aştîye micadeleyê xo dewam bikerî.”

 

Riha de 6ê teşrîna verêne de sereştişê keyeyan amebi kerdene û 4 ci ra mayê aştîye, pêroyî de 12 kesî bi îdîayê “endamîya rêxistine” ameybî destbendkerdene. Mayê Aştîye zî mîyan de destbendkerdişê 12 kesan di rey amebi derg kerdene. Kesê ke ameyî destbendkerdene û karê înan TEM de qedîya sewqê edlîye ameyî kerdene û mayê aştîye Hedle Ogur (49), Fatma Akbaş (56) û Meyaser Korkmaz (49) bi şertê kontrolê edlî serbest ameyî veradayene. Sewbîna seba Maya Aştîye Adalet Çay (60) qerarê hepsê keyeyî ame dayene.

 

Mayanê Aştîye ra Hedle Ogur û Meyaser Korkmaz yê ke ameyî tehliyekerdene ajansê ma rê qisey kerdî.

 

Hedle Ogur ke dîyar kerd destbendkerdişê înan tesadûf nêbi wina va: “Ez dewe de bîya û bostan de xebityayîne. Ameyî mi berdî qezay Pirsusî û uca ra zî berdî şubeyê TEMî yê Rihayî. Labelê sebebê destbendkerdişê mi nêvatî. Dimayê ke şîya emnîyet vatî, 'to sûc kerdo'. Mi zî vat, mi tu suc nêkerdo, şima mi rê suc veto. Wexto ke aciz benê erzenê serê keyeyan. Serra ra tewr tay hîrê rey erzenê serê keyeyê ma. Yan ez yena destbendkerdene, yan domanê mi û yan zî mêrdeyê mi yeno dedtbendkerdene. Wazenê ke ma her wext binê muşahedeyê înan de bê, binê derdê înan de bê.”

 

‘Hêrişê serê mayan newe nîyê’

 

Hedle dîyar kerd ke înan xo rê kerdê hedef û va: “Emrê ma mayan pîl o. Rewşa ma seba koronayî tehluke de ya. Teber de hende tedbîrê korona yenê kerdene, la wexto ke ma destbend kenê korona kenê xo vîr ra. Hêrişê serê mayan newe nîyo û do dewam zî bikero. La ma qetî nêvanê bes o û ma do micadeleyê xo dewam bikerê. Karê ma yê rojane yan zî muracatê ma yê tewr bingeyîn çîyêk vejenê. Ne verdenê ma rehetî keyeyê xo de roşê û ne zî verdenê ma karê xo yê rojane bikerê.”

 

‘Ma 10 rojî tepişte mendî’

 

Meyasere Korkmaz zî va ke 10 rojî TEM de tepişte mendê û va: “Serê siba rew eştî serê keyeyê ma. Ma çiqas sebebê tepiştişê xo pers kerdêne, cewabê ma nêdayîne û vatêne, 'serê dosya de yo' qerarê nimte esto û bi no hawa ma berdî TEM. Ma nêzanayîne ma suc kerdo. Sewbîna di rey wextê destbendkerdişê ma derg kerdî. Ma ra persa çira ma şîyê şîn kerdî. Şîyayîşê şînî suc nîyo, çîyêk heq û xozayî yo. La ma çira nêşêrê hewarî. Ma dejê nê keyeyan pare kenê. Çîyê winasî nêrê cipersayîş û nêrê qebulkerdene. Seba sebebê şîyayîşê hewarî sûc ame vînayene ma 10 rojî TEM de mendî. La wa bizanê nêeşkenê bi hêrişan ma asteng bikerî.”