Rojda Aydin 

 

ŞIRNEX - Cinîyê Şirnexijî, dîyar kerdî şewato ke herême de ame meydan texrîbatêk pîl da xoza û vatî: “Wazenê bi şewat herême bêgane û bêmerdim verdê. La ganî wa bizanê ke ma qetî herra xo ra fek vera nêdanê.”

 

Nêzdîyê 3 mengî yo Cûdî û Gabar de daristanî yenê veşnayene. Çend reaksîyon û çalakîyê welatîyan, reyna seba  mudaxalekerdiş çîyêk nêame kerdene. Wareyêk pîl ê daristanî veşa. Bi şewatî dir zî welatîyê ke tîya ciwîyenê tesîr bî. Êdî nêeşkenê pesdewarî û ramitiş bikerê û no zî tesîr serê ekonomî keno. Sewbîna bi şewatî dir xeylê ganeyê daristanî zî veşayî. Cinîyê Şirnexijî derheqê şewatê daristanan de fikrê xo ma dir pare kerdî.

 

‘Şewat tesîrê ekonomî zî keno’

 

Taybet Sîdar (45) bajarokê dewa Melî ya Şirnexî de ciwîyena, dîyar kerd ke tewr zêde debara xo bi pesdewarî û ramitişî kenê û va: "Semedê şewatê ke emsar vejîyayî, ma zaf bi tesîr bî. Wareyêk pîl ê daristanî veşa. Bi taybetî zî darê ma yê kizwan zî veşayî. Ma debara cuya xo bi daranê kizwanan kenê. Şewat de tena dar nê heme nebat û heywanê ke daristan de ciwîyenê veşayî. Nika herême de çîyêk nêmendo.”

 

‘Ma fek herra xo ra vera nêdanê’

 

Taybete, qiseykerdişê xo de bale ant serê polîtîkayê dewlete ya hemverê herême û wina va: "Dewlete wazena ke bi şewat heme cayan texrîp bikera. Gelo daristan çi zirar danê ke yenê veşnayene. Sewbîna xeylê cayan de kamera ameyê ronayene û daristanî yenê taqîbkerdene. Amanc pawitiş ney, amanc texrîpkerdişê xoza yo. Wazenê heme ganeyan herême ra werte ra wedarnê. La ganî bêro zaneyene ke ma fek herra xo ra vera nêdanê.”

 

‘Wazenê herême bêmerdim verdê’

 

Zeynep Yildiz (20) bajarokê dewa Melî de ciwîyena, dîyar kerd ke herra ke kal û pîranê înan ra menda pêro ameya veşnayene û na rewşe zaf xirab a. Zeynepe qiseykerdişê xo de şewatê ke herême de yenê meydan şermezar kerd û va: “Domanîya ma tîya derbaz bî. La nika pêro ca ameyê veşnayene. Ma zaf xemgînê ke ca û warê ma yenê veşnayene. Seba çi daristanê ma veşnenê? Wazenê herême bêmerdim verdê. Şewatê ke vejênê tesîr serê ekonomî de zî kenê. Bi taybetî zî darê kizwanî û rezê engure yenê veşnayene.”

 

‘Wa destê xo herra ma ra biancê’

 

Ayşe Îşlek ke herêma Koyê Namazî ya Şirnexî ra ya dîyar kerd ke ko, daristan, rez û baxçe yenê veşnayene û wina va: "Seba nê şewat û qedexeyan, ma nêeşkenê şêrê serê herra xo. Xeylê darê ma hetê dewlete ra ameyî veşnayene. Çi beno wa bibo, çi kenê wa bikerê ma do fek herra xo ra vera nêdê. Koyê Cudî û Gabar seba ma girîng o. Ma nê nêzdîbîyayîşê dewlete qebûl nêkenê. Wa destê xo herra ma ra biancê. Çi ma ra wazenê.”