AMED - Sema Barut ke debara aye nêbîne, mêrdeyê aye seba ke dikan akero paştdayîş dayo û Sema wina va: “Mêrdeyê mi ke sere de seba debara keyeyî paştdayîş da mi, nika seba karê keyeyî yeno parekerdene poşman o. La ez veng dana cinîyan ke xo bi karê keyeyî reyde sînor nêkerê.”

 

Senîn ke cinî bi keyeyî sînor kerdî, waştî ke înan berardiş ra dûr bifînê. Labelê hêzê cinîyan oyo ke hem zereyê keyeyî de hem zî teber de berardene bikera. Nê cinîyan ra yew zî qezaya Pasûrî ya Amedî ra Sema Barut (39) a. Sema, roja ke zewicyaya tena bi karê keyeyî reyde eleqedar bîya. La dimayê 20 serran ra terzîxane akena. Sema kar û cuya xo bi kilmî ajansê ma rê qalî kerd.

 

‘Paştdayîşê mi kerd’

 

Sema ke bi serrêke karê deştişê cilan kena bale ante serê destpêkê karê xo û ard ziwan ke bi paştdayîşê camêrdê xo dest bi nê karî kerda û wina va: “Seba nê karî zanebîyayîş û huner lazim o. Wexto ke ez zêde ciwanbîya Stenbol de karê  konfeksîyonî de xebityabîya û perwerdeyê deştişî zî mi dî bi. Seba nê gama ke mi dest kar kerd, mi zahmetî nêant. La dimayê ke zewicyaya heta par zî ez nêxebityaya. Seba ke ma hetê ekonomî ra tengî ant, mi dest nê karî kerd. Mêrdeyê mi karê înşaetî kerdêne û seba ke warê debara keyeyî de mecbûr mend, wexto ke mi dikan akerd sere de paştdayîş da mi û mi terzîxane akerd. La nika poşman a. Seba ke karê keyeyî yeno parekerdene.”

 

‘Dimayê 20 serrî zereyî keye ra vejîyaya’

 

Sema dîyar kerd ke dimayê 20 serran zere ra vejîyaya û wina va: “Demo ke mi dest bi xebate kerd, mi xo zaf cîya hîs kerd. Tersaya ke nêeşkî binê nê karî ra vejîyî. Seba ke ez destpêkê zewacê xo de heta serra par tena bi karê zereyê keyeyî reyde eleqedar bîne. Xebata teberî zî seba mi gamêk zaf girîng bi. Mi sere de nêwaşt la bi demî dir musaya. Helbet xidarîyê nê karî zî estê. Dikanê mi hema newe yo û coka ganî bêro naskerdene. Sewbîna şubeyê korona zî ma asteng keno. Wext ame ke ez nêeşkaya kîrayê dikanî bidî. Pêwa nê çîyan reyan seba giranîyê karî heta saetê erey xebityaya û karê min ê keye mendêne.”

 

‘Mêrdeyê mi nika bi akerdişê dikanî reyde poşman o’

 

Semaya ke mabêne de bi mişteriya dikanê xo reyde eleqedar bîne wina va: “Seke şima vînenê karê mi reyan zaf giran o. Seba ke ez reyan heta saetê erey xebityena, o zî beno sebeb ke karê keyeyî ez hende nêeşkena bikera. Coka xeylê karê keyeyî kewto serê milê mêrdeyê mi. O seba karê keyeyî acis o. Êdî nêwazeno ez bixebityî. La êdî qedîya. Ez fek karê xo ra vera nêdana. Seba ke mi ked û berardişî de cinî nas kerd. Ganî heme cinî serê linganê xo de bieşkê vinderê.”