AMED - Bi hemkarîya Metal Kollektîf û A4 Atoyeyî projeyê bi nameyê ‘Karê Hempar' ame destpêkerdene. Hedîye Yaşara ke proje de ca gêna va: “Bi heykelan ma waşt ke rewşa cinîyanê koçberan bidê ramojnayîş. Ma do menga teşrîna peyêne de zî pêşengehê xo abikerê.”

 

Bi hemkarîya Metal Kollektîf û A4 atoye, projeyê bi nameyê ‘Karê Hempar' ame destpêkerdene. Projeyê ke caardişê ci ame kerdene, serê babeta cinî û koçberî de yo. Nê projeyî de 15 cinîyê ke ca gênê, tewir bi tewir karan de xebityayê û sewbîna hunermend ê. La bi xêrê nê projeyî berardişê xo vejenê werte. Proje do menga teşrîna peyêne de bêro ramojnayene. Derheqê proje de Hedîye Yaşar ke na xebate de ca gêna ajansê ma rê qisey kerde.

 

Hedîye, destpêkê qiseykerdişê xo de bale ante serê amancê projeyê bi nameyê ‘Karê Hempar' û wina va: "Ez 9 serrî yo karê hunerî kena. 2017 de mi pêşengehêk şexsî akerd. Pêşengeh de babeta xebata mi ‘Cinî’ bî. Na xebate zaf bale ante û bi no hawa ma waşt ke dewamê nê xebatan bîyarê. Nika zî xebata ke ma viraznenê serê babeta koçberî de cinî yê. Ma na xebate de waşt ke tena heykelê cinîyan viraznê. Semedo ke eke ma camêrdan ra fîgur biviraştêne do sey leşkeran biasayîne. Yan zî eke ma domanan biviraştêne, tay sey hîsgêr asayîne. Coka ma waşt ke na babete de ma heykelê cinîyan bixebitnê. Ma amanc kerd ke  rewşa koçberê cinîyan bîyarê ziwan.”

 

‘Proje de 15 cinî ca gênê’

 

Hediye, dîyar kerd ke projeyê Metal Kollektîfî de 15 cinî ca gênê û wina va: “Cinîyê ke karê cîya de xebityenê, hunermend nêbî. Dimayê rayberîya na xebate, ma bi atolyeya A4 reyde kewtî têkilî. Sewbîna çarçewaya na proje de berardişê ke vejîyayî meydan, ma do biroşê û ê peran zî ma do bidê komele û weqfê koçberî. Ma nêwazenê no proje bibo ê kesan. Ma sere de embazanê xo reyde qisey kerd û kom bî. Seba proje ma xeylê kombîyayîşî kerdî. Helbet no proje de ma bi problemê ekonomî reyde rî bi rî mendî. Dimayê ke ma malzemeyê xo kom kerdî, kesê ke îmkanê înan bî, ameyîne atolye xebatanê xo kerdêne. Sewbîna çîyo tewr girîng zî ma heykelanê xo bi malzemeyê ke çîyêk rê nêbenê û yê ke yenê eştiş viraznenê.”

 

‘Menga teşrîna peyêne de pêşangeh bêro akerdene’

 

Hedîye tewr peyîn qiseykerdişê xo de serê ameyox de qisey kerd û va: "Ma heykelê xo serrêke verê nika amafe kerdib. Labelê semedê vîrusê korona ma karê xo taloq kerdib. Ma nika hewl danê ke menga teşrîna verêne de pêşangeh abikerê. Proje bi destkewtişê cinîyan ame meydan. Cinî tarîx de her wext hetê  estetîk û berardişê wayîrê rolêk girîng girewt la qetî no çî nêasa. Ma bi na xebate waşt nê çîyan vejê werte û raya pêroyî bikerê. Ameyox de sî ma sey metal kollektîfî proje û xebatê xo wazenê dewam bikerê.”