AMED - Hemşaredara Akdenîzî Yuksel Mutlu ke vera ci qeyûm ame tayînkerdene, dîyar kerd ke qeyûmo ke ameyo tayînkerdene projeyê înan diznayo û wina va: “Şarî xapênenê la  her kes înan nas keno. Şaredarîya ke cayê ma xesp kerd, do şar peyser bigîro.

 

Serra 2016 de qeyûmî tayînê şaredarîyanê Partîya Demokratîke ya Şaran (HDP) û Partîya Herêmê Demokratîke ameyî kerdene. Labelê qeyûmî bi diznayîşê projeyan zî benê rojev. Nimûneya tewr girîng zî xeberêke hetê TRT ra derheqê şaredarîya Sêrtî de ame viraştene de, projeyê şaredarîya HDPyî sey ê qeyûm amebi ramojnayene. Serra 2014 de qezaya Akdenîzî ya Mêrsînî de Yuksele Mutlu hemşaredar amebî weçînayîş û Mêrsîn de projeyê "Keyeyê tenûran" kerdib faliyet. La Yuksele 2016 de wezîfeyê xo ra ameye girewtene û projeyê aye nimcet mendib. Dimayê ke şaredarî 2019 de kewte destê AKPyî şaredarê AKPyî Mustafa Gultak îdda kerd ke proje aîdê înan o.

 

Yuksele Mutlu nê helwestê şaredarîya AKPyî rexne kerd û vat ke dizdê projeyan o.

 

‘Keyeyê tenûre çimeyê debara şarî bî’ 

 

Yuksele dîyar kerd ke înan verê weçînayîşî îdarekarê herême reyde bi cinîyê taxan dir û bi rêxistinê cinîyan dir kombîyayîş kerdê û vat ke înan proje dayê destpêkerdene. Yuksele wina va: "Demo ke ma ameyî weçînayîş, proses tehluke bi. Pêwa nê zî ma sozê ke dabî şarî ma hewl da ke bi ca bîyarê. Nê projeyan ra yew zî 'Keyeyê tenûre bi.’ Sewbîna Keyeyê Tenûre do seba cinîyê ke wareyê îstîmlakî ca nêgirewtêne bîbî wareyê ke problemê xo pîya pare bikerê zî.”

 

‘AKP şîdetê serê cinîyan heq vîneno’

 

Yuksele ard vîr ke serra 2016 de qeyûm tayînê Şaredarîya Akdenîzî ameyo kerdene, ameya destbendkerdene û tepiştene û nika zî muhakemeyê ci dewam de yo û va: "Dimayê ke qeyûm ame tayînkerdene, stargehê cinîyan û merkezê muracatî yê cinîyan ame padene. Qeyûm sere de cinîyan kar ra vet. Projeyêk ma zî 'keyeyê taxe bi.’ Ma bi nê projeyê xo xelata şaredarî girewt. La înan keyeyê ma pada û stargehê cinîyan kerdî stargehê kal û pîran. Sewbîna hîn keyeyê mende zî dayî emniyet û hîn zî sey cayê qursê Kuranî ameyî vurnayene. Zîhnîyeyê AKPyî şîdetê serê cinîyan heq vîneno yo.”

 

‘Do şar şaredarîya xo newe ra bigîro’

 

Yuksele bale ante serê xeberêke ke çapemenîya herême de ameye weşaneyene û wina va: "Mi a roje xeberêke  çapemenîya herême de dî ke qeyûm vatêne porojeyê "Keyeyê tenûre' ê înan o. La muxabirêk çapemenîya herême ci ra vato, 'No poroje ê înan nîyo ê şaredarîya HDPyî yê Akdenizî yo.’ AKP eynî wextî de dizdîyê projeyan zî keno. La do şar şaredarîyê xo reyke bîn AKPyî ra bigîro.”