ÎZMÎR - Yew merdima hepsîyan Dîdar Gula ke şî serdayîşê zîndanî, va ke kitab û mektuban nêdanê hepsîyan û ganî her kes bibê vengê hepsîyan.

 

Tirkîya de dimayê rewşa pandemîyê korona vîrusî zîndanan de îhlalkerdişê heqan binê nameyê, "tedbîrî" de zêde benê. Dîdar Gula ke Zîndanê Şakranî ya Cinîyan û Zîndanê Kiriklar ê Sîlîvrî şî serdayîşê merdimanê xo, dîyar kerd ke prosesê pandemî de tecrîdê zîndanan twer giran bîyo û yeno waştene ke dewam bikero.

 

‘Yê ke bi vîrusê û yê ke vîrus nîyê pê dir manenê’

 

Dîdare dîyar kerd ke Zîndanê Kiriklarî de hepsîyê ke vîrusê korona kewtê, hepsîyê sîyasîyan dir eynî korîdor de yenê tepiştene û ard ziwan ke Zîndanê Elbîstanî de hepsîyêk vîrus ra dinyaya xo bedilna yo. Dîdare wina dewam kerd: "Dîyar o ke AKPyî kesê ke tecawiz kerdî û kiştoxan zîndan ra vet, nika zî bi rayîrê vîrusî hêrişê hepsîyê şorişgêran keno.”

 

 

‘Bi qedexeyê kitaban tecrîd yeno girankerdene’

 

Dîdare ard ziwan ke Zîndanê Hûmara 9î yê Sîlîvrî de mektubê ke hepsîyan rê yenê erşawitiş, nêdanê înan û wina vat: “Zîndanê Tekîrdagî de fotokopîyê mektuban nêdanê hepsîyan. Zîndanê Bakirkoyî de zî mektubê hepsîyan erey danê înan. Eynî wextî de îdarekarê zîndanî zî dîyar kerdo ke do di mengan reyke mektubê hepsîyan bidê înan û neql kerdo ke xêrcê roşanê dînî, rojê taybet yê sey rojbîyayîşî do kitabê hepsîyan nêdê înan. Bi nêdayîşê kitaban reyde wazenê ke hepsîyan bi her tewir tecrîd bikerê. Wazenê prosesê pandemî seba xo açernê îmkan û tecrîdê serê hepsîyan tewr giran bikerê.”

 

‘Ganî zîndanî tewr zêde rojeve de bê’

 

Dîdare va ke îqtîdar bi çimê esîran ewnîyeno hepsîyan ra û wina va: "Kesê şorişgêr û demokrat ganî hem erjê şorişgêrî wayîr vejîyê û hem zî erjê merdimayî vejîyê. Komeleyê heqê merdiman, weqfê bîyaye bi taybet wayîr vejênê. La ganî tewr zêde wayîrê hepsîyan bêro vejîyayîş.”