'Camê eştan ra berardişê newe awan kena'

 

 

AMED - Hunermende Sîbel Ahmetler 20 serrî yo bi camanê şikite û yê ke ameyê eştene berardişê newe awan kena. Sîbele, dîyar kerd ke cam her wareyê ciwîyayîşî de esto û va: "Camê ke lazim nîyê û ameyê eştiş seba mi zaf bi qîmet ê, ez nê caman açernena berardişê cîya. No çî feyde dano xoza zî. Ez wazena pêşengehê xo abikerî."

 

Cinîyê ke wareyê hunerî de ca gênê goreyê hîs û fehmê xo form danê berardişanê xo. Înan ra yew zî Sîbel Ahmetler a. Sîbele nêzdîyê 20 serrî yo bi karê hunerî rê eleqedar bena. Sîbele 6 serrî yo ke Eskîşehîr ra verê xo daya Amed. Amed de nika atolyeyêk akerda û bi xebat û bererdaşê xo yena nasnayene. Sîbele camê ke şikiteyê û ameyê eştiş arêdana û berardişêk newe awan kena. Sîbele derheqê kar û barê xo de ajansê ma rê qisey kerd.

 

'Hişê mi de her wext çîyêk cîya estbi' 

 

Sîbele dîyar kerd ke serê hunerê camî de xeylêk teknîkan xebitnaya û wina va: "Dimayê ke ez Unîversîteya Înonu ya Maletî ra mezûn bîya, ez bi camî dir eleqedar bîya. La bi wextî dir xêrcê camî hacetê bîn zî seba hunerê xo mi xebitna. Unîversîta de her tewir derse ma dî la hişê mi de çîyêk cîya bi. Hunerê xo yê camî mi demî dir aver berd. Seba ke îmkanê ma zêde qîm nêkerd, teknîkê camî de zafê xo serê fûzyon û pêwadayîşî xebityaya. Mi serê nê teknîkan de xeylê ked û xebat da û nika ameya na sewîya."

 

'Pêwa probleman reyna zî mi fek karê xo ra vera nêda'

 

Sîbele dîyar kerd ke kesê ke bi karê hunerî reyde eleqedar ê her wext mîyanê micadeleyî de yê û va: "Destpêk de mi hende paştdayîş nêdî. Hem seba xebata min a hunerî û hem zî seba ke ez cinî bîya ewnîyayîşê negatîfî serê mi de bî. Sewbîna çi heyf qîmetê hunerî hende nîno zanayene. Yan zî asan yeno vînayene. Coka hunermendî her wext seba hunerê xo aver berê, kewenê mîyanê hewldayîşî. Sey her hunermende ez zî probleman reyde rî bi rî manena. La bawerî û heskerdişê min ê serê hunerî qetî nêverda ez fek ci ra vera dî. Hunerê mi bêro qebûlkerdene û nêro qebulkerdene zî ez wazena Amed de hunerê mi bêro heskerdene."

 

'Feydeyê mi xoza rê zî virazya' 

 

Sîbele eynî wextî de bale ant serê hunerê xo û va: "Cam her wareyê cuya ma de esto. La wexto ke cam bêro şikitiş, erzenê erd. Na nuqta de zî ez kewena devre. Wexto ke nê caman erzenê, ez xemgîn bena û înan ser fikrîyena. Xora ez karê camî kena û gama ke mi teber ra ewnîya her ca de cam esto. Mi zî va, ez çira nê caman nêxebitnî û mi wina dest bi hunerê xo kerd. Feydeyê mi hem xoza rê virazya û hem xebate û hem zî derûdorê xo rê. No çî zî mi zaf kêfweş kerd."

 

'Ez wazena pêşengehêk abikerî'

 

Sîbele dîyar kerd ke karê aye hema newe yo û wazena biresno xeylê cayan û va: "Semedê naskerdişê karê mi 2 serrî lazim o. Eynî wextî de Ensititûyê averşîyayîşî de xebityena. Bi no hawa hetê ekonomî de mi rê beno hetkar û lazimîyê xo yê keyeyî bica ana. Ez zana ke karê mi asan nîyo la hewldayîşê mi seba averşîyayîşî esto. Tirkîya de ewnîyayîşê serê hunerî goreyê herêman vuryeno. Umîdê mi o yo ke ez pêşengehê berardişanê xo abikerî. Sewbîna gama ke berardişanê xo roşena, semedê heywanan werd gêna. No zî mi kêfweş keno. Se beno wa bibo ganî merdim çîyê ke hez keno bikero. Na xoza tena semedê merdiman nîya, semedê nebat û heywanana zî."