Medîne Mamedoglu

 

MÊRDÎN - Serê îşxalkerdişê Rojawanî reyde serrêk derbaz bi. Wextê îşxalkerdişî de semedê bombayê ke eştî Nisêbîn 3 ci ra cinî 12 kesî dinyaya xo bedilnayî. Kesê ke dinyaya xo bedilna înan ra yew zî Dara Alî (19) bi. Dayîka Dara Meryem Alî dîyar kerd ke sey hedîse vizêr qewîmîyaya dejê ci newe ya.

 

Dimayê ke dewleta tirkî verê serrêk hêrişê Rojawan kerd, qezaya Mêrdînî Nisêbîn de serê sînorê Vakur û Rojawan de bi, bi hedefê bombayan û netîce de 3 ci ra cinî 12 kesî dinyaya xo bedilnabi. Netîceyê bombayê ke tarîxê cîya cîya de ameyî eştene, xeylê kesî zî birîndar bîbî. Nê hêrişan ra yew zî 11ê teşrîna verêne Nisêbîn de kuçeyê Hamamî de amebi meydan û teqayîş de 9 kesî dinyaya xo bedilnabi. Bi seyan kesî zî birîndar bîbî ke nînan ra yew zî koçberê Sûrîyeyij Dara Elî (19) bi.

 

Wexto ke waşt bi birîndarî reyde bibo hetkar ame kiştene 

 

Dara Elî 2014 de semedê şerê Sûrîye bi keyeyê xo dir amebi û  Nisêbîn de bi ca bibi. Dara ke gama ke şîne keyeyê xo taxa înan de teqîyayîş amebi meydan û Dara waştib ke hetkarîya birîndaranê giran bikero la teqayîşê diyîn ke amebi meydan dinyaya xo bedilnabi.

 

‘Ez dimayê bi saetan musaya ke ameyo kiştene’ 

 

Dayîka dara Meryem Alî vat ke aye semedo ke lajê xo bîyaro nê rojan xeylê kede daya û vat, dimayê bi saetan musaya ke lajê ci dinyaya xo bedilnayo û va: "Wexto ke teqayîş ame meydan mi telefonê lajê xo kerd. La kesê ke cewab nêda. Ez zî şîya qehwexaneyê ke her wext lajê mi şîne û persê ci kerd. Mi ra vatî, roşe ma do ci bigeyrê û ma do zanayîş bidê. Dimayê bi saetêk ageyrayî û xemgîn bî. Mi va, se bîyo? Cewab nêdayî mi. Dima ra mi berdî nêweşxane û cenazeya lajê mi û nasnameyê ey ramojnayî mi.”

 

‘Ez bawer nêkena ke serrêk derbaz bîyo’ 

 

Meryeme dîyar kerd ke sere de bawer nêkerdo ke lajê ci ameyo kiştene û va: "Dejê ey zerrîya mi de sey ewro newe yo. Tu çîyêk sey bêçaretî zehmet nîyo. Ez vana qey vizêr lajê mi merdo û bawer nêkena ke serrêke serê mergê ey ra derbaz bîyo. Ez zaf bêriya ci kena. Mi ey bi rojaneya ke pê xebitêna wey kerd. Ez hema zî bawer nêkena ke ameyo kiştene. Serê herra xo nêame kiştene la koçberî de ame kiştene û no zî mi zaf  xemgîn keno.”