Medîne Mamedoglu

 

MÊRDÎN - Dimayê ke 9ê teşrîna verêne 2019 de hemverê Vakur û Rojhelatê Sûrîye hêriş ame kerdene, Nisêbîn zî nê hêrişan ra tesîr bi û 13 welatî seba bombavaranî dinyaya xo bedilnabî. Hemşaredar Semîre Nergîz, dîyar kerd ke semedo ke şaredarî xizmet nêda welatîyê ke hêriş ra tesîr bîyê, qeyûm tayînê şaredarî kerdî.

 

9ê teşrîna verêne 2019 de hemverê Vakur û Rojhelatê Sûrîye de hêrişêk ame meydan û hêriş de cayê nzêdîyê sînor zî tesîr bî. Nisêbînê Mêrdinî zî no wext de bombayan ra 13 kesî dinyaya xo bedilnayî. Nê demî de Şaredarîya Nisêbînî ke destê Partîya Demokratîke ya Şaran (HDP) de bî û Masaya Krîzî awan kerd. Waşt problemê welatîyan çareser bikera. La hemşaredarê Nisêbînî ameyî destbendkerdene û tepiştene. Vera hemşaredaran qeyûm ame tayînkerdene. 

 

15ê teşrîna verêne 2019 de hemşaredara Nisêbînî Semîre Nergîz ameye destbendkerdene û  17ê teşrîna verêne de zî ameye tepiştene. Aye neqlê Zîndanê Girewte ê Tîpê T yê Xarpêtî kerdî. Dimayê îtîrazê Semîre serbest ameye veradayene. Semîre derheqê prosesî de ajansê ma rê qisey kerd.

 

'Ma waşt ke ma bibê çareserîyê probleman'

 

Semîre, destpêkê qiseykerdişê xo de bale ante serê hêrişê hemverê Vakur û Rojhelatê Sûrîye û wina va:  "Hêrişê ke herême de ameyîne meydan, tesîr tîya zî kerd. Înan ra yew ca zî Nisêbîn bi. Nisêbîn açerya wareyê şerî. Tîya de bomba teqayî û xeylê welatî dinyaya xo bedilnayî. Pêrodayîşan de şaredarî seba hewcedarîyê şarî merkezêk krîz akerdî. Ma waşt ma bibê cewabê şarê xo. Ma waşt hemverê probleman ma çareserî awan bikerê."

 

'HDP ame muhakemekerdene'

 

Semîre, qalê tayînkerdişê qeyûman kerd û wina va: "Hêrişan de her wext cinî bî hedef û ameyî destbendkerdene û tepiştene. Her kuçeyê Nisêbînî ameyîne taqîbkerdene. Şert û mercê wina de ma xebatê xo kerdî. 15ê teşrîna verêne de polîsan eşt serê keyeyê mi û ez ameya destbendkerdene. Bêsebeb ez ameya destbendkerdene û 2 rojan de ez vejîyaya mehkeme û ameye tepiştene. Mi mehkeme de dî ke HDP yeno muhakemekerdene."

 

'Îradeyê şarî seba ma girîng o' 

 

Semîre tewr peyîn wina vat: "Hemverê îradeyê şarî darbeyêk ame meydan û seba tayînkerdişê qeyûman xo rê sebeb geyrayîne. Tewr peyîn zî qeyûm tayînê şaredarî zî kerdî. Seba demêk eşkenê zerrîya xo rehet bikerê. La ganî bêro zanayene ke tayînkerdişê qeyûman hemverê huqûqî yo. No çî yeno manaya darbe. La semedê ma çîyo girîng îradeyê şarî yo."