Rojda Aydin

 

ŞIRNEX - Cinîyê Şirnexijî, çarçewaya kampanyaya “Ma xo pawenê” de fikrê xo ardî ziwan û vatî ke na kampanya seba înan zaf girîng a û vengdayîşê wayîrvejîyayîşê kampanya kerdî.

 

Têgirayîşê Cinîyê Azadan (TJA) 14ê Êlule de bi sloganê, “Ma xo pawenê” kampanyek da destpêkerdene û 4 mengan do na kampanya dewam bikera. Dimayê ke TJAyî xeylê şaristanan de startê kampanyaya xo da, xeylê cayan de cinî hemverê şîdet û hêrişê serê cinîyan vejîyayê wareyan û şîdetî rê vatî “nê.” Cinîyê Şirnexijî zî ke paştdayîş danê kampanya, fikrê xo ma dir pare kerdî.

 

Aktîvîsta TJAyî Zîlan Ecevît, dîyar kerd ke kampanya ke ameya destpêkerdene seba cinîyan zaf girîng a û wina vat: “Komelî yewbînan dir parçe kerdê. Hemverê cinî, doman û komelê kurdan de hêrişê xidar yenê kerdene. Wazenê cinîyê kurdî yewbînan ra parçe bikerê û vila bikerê. La reyna kesê ke kom bikerê reyna cinîyê kurdî yê. Hemleyê ke TJAyî dayo destpêkerdene rastî zî zaf girîng o. Ganî pêro cinî wayîr vejîyê. Ganî heme tax, kuçe û wareyan de cinî wirzê serê lingan û paştdayîş bidê kampanyaya TJAyî. Ma do seserra 21ê de rayberîya cinîyan de hem xo û hrm komelê xo azad bikerê. Çarçewaya kampanya de ma do xo biresnê pêro cinîyê ke şîdet bi înan yeno kerdene. Ma do pêro cayan de vengê xo berz bikerê.”

 

‘Ma do senîn xo bipawê?’

 

Endama Meclîsê Pêroyî ya Merkezê HDPyî ya Şirnexî  Şîrîn Kilinç zî dîyar kerd ke çarçewaya kampanya de înan dest bi xebatê xo kerdê û wina vat: “Ma do her ca bigeyrê û xo biresnê cinîyan. Sewbîna ma do dewan zî bigeyrê fikr û hîsê cinîyan bigîrê. Ma do cinîyê dewijan goşdarî bikrrê û waştişê înan bigîrê verê çiman. Xeylê tewirê şîdetî esto. Hemverê desteştişê serê cinî, doman, xoza, ziwan, kultur û hûnerî de ma do xo bipawê. Ganî ma cinîyê mîyanê keyeyê xo haya bikerê û derheqê şîdetî de zanayîş bidê înan. Ma do pêro cinîyan rêxistin bikerê. Şîdet tena serê bedenê nîyo, her tewir şîdet esto. Coka ma do keye bi keye bigeyrê, bi cinîyan dir sohbet bikerê û serê tewirê şîdeyî de fikrê înan bigîrê.”

 

‘Rejîmê yew mêrdeyî hêriş keno’

 

Endama Meclîsê Pêroyî ya Merkezê HDPyî Elfesya Nas zî wina vat: “Hêrişê hemverê cinîyan ke bi taybetî serê cinîyê Botanî de yeno kerdene, bi destê camêrd dewlete yeno kerdene. No desteştişê hemverê cinîyan, hetê Erdoganî ra yrno kerdene. Rejîmê yew camêrdî yê tecawizkar hêrişê cinîyan keno. No hêriş tena cinîyan rê nê, xoza, doman, kuçe û keyeyanê ma rê zî yeno kerdene. Coka ma sey cinîyê Botanijî hemverê nê hêrişan ma dewe bi dewe geyrenê û cinîyan dir qisey kenê. Ganî ma xo û embazanê xo bi pawê. Bi taybetî gerek ciwanê ma tewrê kampanya bibê. Ganî ma têkoşînê xo keye ra dest pêbikerê. Coka na kampanya ma rê zaf girîng a. Cinî xoza, mamoste, zanyar û nasnameyê ma ya. Ma do derûdorê na kampanya de kom bê û vengê xo berz bikerê.”

 

‘Ma hemverê zulmî sere nêtewênenê’

 

Zehra Begenîr zî va ke kampanyaya ameya destpêkerdene seba cinîyan zaf girîng a û wina va: “Ma do xo birêxistin bikerê. Do êdî wareyan ra vengê cinîyan berz bibo. Ma hêriş û şîdeto ke hemverê cinîyan yeno kerdene qebûl nêkenê. Eke ma hemverê hêrişan bêveng bimanê, do hêrişî zêde bê. Wext wextê xopawitişî yo û vengê xo berzkerdişî yo. Ma hemverê zulmî sere nêtewênenê. Wa cinî vengê xo berz bikerê. Do xoverdayîşê ma dewam bikero. Coka na kampanya seba ma zaf girîng a. Ganî her kes wayîr vejîyo.”