WAN - Wan de bado ke çar rojanemegerî ameyî destbendkerdene, qerarê qedexeyê vînayîşê avûkatan ê 24 saetan ame dayene.

 

Polîsan serê sibayî eşt buroyê Ajansê Mezopotamya yê Wanî û keyeyanê muxabîranê Jinnews ser. Sereştişan de muxabîrê MA Adnan Bîlen û Cemîl Ugur, muxabîra ma Şehrîbane Abî û rojnamegere Nazan Sala ameyî destbendkerdene. 

 

Polîsan keyeyî serûbin kerdî, dest na kamera û hacetanê teknîkî ser. Derheqê înan de qerarê qedexeyê vînayîşê avûkatan ê 24 saetan ame dayene.

 

Polîsanê ke berê buroyê Ajansê Mezopotamya bi çîlîngîrî akerd zere de bi saetan cigêrayîş kerd. Destur nêdîya ke muxabîrî zî wextê cigêrayîşî de şirê zere. Muxabîrê MA Cemîl Ugur wextê sereştişî  hela ke bi hêriş ameyêne destbendkerdene embazanê ci waşt ke dîmenê ci binacî la polîsan vîdeoyê înan kamera ra esteritî. 

 

Derheqê rojnamegeranê destbendkerdeyan de qerarê 24 saetî nêvînayîşê avûkatan ame dayene.