AMED - Endama awankerdoxa Komeleya Cinîyan a Rosa Narîne Gezgor, dîyar kerd ke bi destbendkerdiş û tepiştişan wazenê hêzê yewîya cinîyan biqedênê û wina vat: "Ma cinî heqê merdiman pawenê û verê her çî heqê cinîyan pawenê. Ma do her wext wareyan de micadeleyê xo dewam bikerê."

 

Polîsan 22yê Gulane de eşt serê Komeleya Cinîyan a Rosaye û xeylê endam, îdarekar û awankerdoxê komele destbend kerdî. Endama awankerdoxa Komeleya Cinîyan a Rosa Narîne Gezgor zî ke bi îdiayê “endama rêxistine” de 24ê Gulane de amebî destbendkerdene. Narîna ke 4 mengî Zîndanê Girewte yê Cinîyan ê Amedî de ameyîne tepiştene, 4ê êlule de serbest ameye veradayene. Narîne ajansê ma rê qisey kerd.

 

'Waştî ke hêzê yewîya cinîyan asteng bikerê' 

 

Narîne dîyar kerd ke wazenê Komeleya Rosa krîmînalîze bikerê û wina va: "Sebebê tepiştişê ma endamîya rêxistine’ bi. Bi îfadeyê şahîdê nimte, waştî ke komela kirîmînalîze bikerê. Eşkere yo ke hêrişik serê Rosa de esto, la çira? Ganî ma na babete ser o vinderê. Seke yeno zanayene munaqeşeyê wedaritişê Pêameyîşê Stenbolî ameyîne kerdene, hetêk ra bi Qanûnê Înfazî dir kesê ke şîdet û desteştiş serê domanan de yeno kerdene waştêne meşrû bikerê. Bi no hawa tevgerê cinîyê Tirkîya û tevgerê cinîyê kurdî hemverê çîyan  têkoşînek da. Reyna seba nê micadele de tevgerê cinîyê Tirkîya û tevgerê cinîyê kurdî hemverê nê çî bîbî. Bi no hawayî hêzêko pîl ê cinîyan vejîya meydan. Coka ma ameyî tepiştene."

 

'Ma vindî nêkerd'

 

Narîne dîyar kerd ke wayîrê vejîyayîşê Rosaye girîng bi û wina va: "Waştî ke micadeleyê ma yê hemverê şîdet û qetilkerdişê cinîyan  asteng bikerê. Waştî ke xebatê ma biqedênê la ma vindî nêkerd. Pêwa nê temamê tevgerê cinîyê dinya, tevgerê cinîyê tirkîya û tevgerê cinîyê kurdî wayîrê Rosayî vejîyê. Xebatê Rosaye werte de bî û komeleyêke bi destûrê walîtî Amedî û Wazeretê Karê Zerî ra ame akerdene. Ma kesê ke Rosa de ca girewtene zî komelî de tewir bi tewir wayîrê statûyêk ê. Ma verê de zî xebatê cinîyan kerdêne. Yan zî kilmî ma eşkenê vajê ke micadeleyê cinîyan ê hempar waştî ke bipelçiqnê. La verpayê ci ma hema xurtêr bî."

 

'Înan bi hemkarîya cinîyan vindî kerd'

 

Narîne wina vat: "Hemverê şîdetê camêrdan û polîtîkayê AKP-MHPyî ke serê cinîyan de kenê, temamê cinîyê Tirkîya xo ver danê. La hêrişêk serê Rosa de ame kerdene. Seba ke cinîyê ke Rosaye de ca girewtene, ez zî tede, wayîrê di nasnameyî bî. Hetêk ra nasnameyê cinbîyayîşî yo hetêk ra zî nasnameyê kurdbîyayîş bi. Seke ma vat, xebatê ke Rosa kena bi temamê bi raya umumî û çapamenî rê ameyê parekerdene. La nêeşkenê komele krîmînalîze bikerê, seba ke bi hemkarîya cinîyan o krîmînalîzekerdiş vindî kerd."

 

'Heta aştîyêk mende ma do wareyan de bê' 

 

Narîne tewr peyîn de wina vat: "Sebebê tepiştişê ma xora xebatê ma yê şexsî bî. Seba xebatanê Rosa nêbi. Seke seba çalakîyê hemverê qeyûmî, çalakîyê seba paştdayîşê grevê vêşanîye, çalakîyê ke dayîkan viraştibî. Sewbîna çalakîyê ke hemverê şîdetê cinîyan ma kerdibî û çalakîyê ke seba aştîye bi nameyê ‘Cinî aştîye wazenê' ma kerdib. Seba nê dewa ma rê amebî akerdene. Ma cinî heqê merdiman pawenê, heqê cinîyan pawenê û vernîya her çî heqê ciwîyayîşî pawenê. Sewbîna ma hemverê tecrîdî vindenê. Seba ke tecrîd, tewr zêde tesîrê serê cinîyan keno. Ma do her wext vajê, ‘kiştişê cinîyan polîtîk o’, ‘Cinî bi pîya hîna hêzdar ê' û ma seba aştîye mende do her wext wareyan de bê."