WAN - Musvet Kara ke lajê aye 2014 de demo ke leşkerî kerdêne qerekole ra rema û beşdarê PKK bi, rojê vîyarte de zanayîş girewt ke lajê ci dinyaya xo bedilnaye. Serê nê zanayîşî de şî Colemêrg la cenazeya lajê ci nêdayê.

 

Musvete Kara,seranserê cuya xo de hemverê tedayê dewlete û krîzê ekonomî têkoşîn kerd. Gimgimê Muşî ra koçê Aydinî kenê û uca ra zî mecbûr manena ke koçê Stenbolî bikera. Heme şaristanan de hem rastê binpaykerdişê kede û hem zî rastê tedayan ameye. Lajê Musvete 2014 de şino leşkerî û uca ra beşdarê PKK beno. Lajê ci Samet Kara 6 serrî dima dinyaya xo bedilneno û Musvete nika seba lajê xo ameye Wan.

 

Samet 2014 de ke o wext Mûş de ciwîyayîne şino Amasya leşker. Dimayê ke yewîneyê acemî qedêneno dima înan erşawenê Geverê Colemêrgî. Samet, prosesê leşkerî de rastê dewlete bi kurayî hîs keno. Serê nê de hî bêveng nêmaneno û qereqole ra rameno û beşdarê PKK beno.

 

'Lajê to ça de yo' 

 

Bi kargoyêk hacet û nasnameyê lajê ci,  Musvete rê yeno erşawene û vanê ke lajê to leşkerî ra remayo. Musvete lajê xo geyrena la kes ci rê nêbeno cewab. Polîsî erzenê serê keyeyê aye û vanê ke lajê to beşdarê PKKyî bîyo. Dimayê nê xeylê reyan rastê persa, ‘lajê to ça de yo' yena. Musvete wina va: "Menge ra 3 rey eştêne serê keyeyê ma û vatêne, ‘lajê to ça de yo, ti zana, cayê ci vaje'."

 

Tena serê keyeyê Musvete de ney, serê keyeyê kênaya aye ke Aydin de ciwîyena zî erzenê û birayê ci, ci ra yeno perskerdene. Polîsî bi vatişê seke, ‘ti biwazê ma do birayê to bîyarê, uca de zî îstîxbaratê ma esto' wazenê keye bi tesîr bikerê.

 

Teda tesîr Musvete nêkeno

 

Pêwa pêro tedayan Musvete û keyeyê xo bi tesîr nêbenê. Dewlete taktîkê bîn kena. Dewlete wazena ke keyeyê înan zî verê keyeyê ke 2019 de verê HDPyî Amedî de roniştibî, bêrê têhet û veng bidê lajê xo. La Musvete cewabêk bi şîdet dana. Musvete seba pêşnîyazî wina vana: "Mi lajê xo sax erşawit leşkerî. Lajê mi dewlete vindî kerd. Ez lajê xo AKP, dozger û dadgerî ra wazena. HDPyî lajê mi vindî nêkerdo ke ez şêrî verê HDPyî. Tîya de senaryoyêk awan kerdê, meaş danê, wezîfedarê pawitişî danê."

 

'Ez cenazeya lajê xo wazena'

 

Musvete çapemenîya hetgir de musena ke lajê ci bi embazêk xo dir Colemêrg de pêrodayîşêk de dinyaya xo bedilnaye û nê ser yena Colemêrg û cewabê cenaze tîya nîya yena. Serê nê de Wan de muracatê Komeleya Kultur û Yewîneya Paştdayîş û Hetkarîya Keyeyê Merdimê Xo Derguşê Şaristanîyan de ( MEBYA-DER) da. Musvete dîyar kerd ke aye cenazeya lajê xo wazena.

 

'Şima biwazê ma eşkenê lajê şima bîyarê' 

 

Musvete dîyar kerd ke seba teda û sebebê ekonomî Muş ra koçê Aydinî kerdê û uca ra zî şîyê Stenbol û va: "Mi mêrdeyê xo rew vindî kerd. Ez domananê xo rê hem bîya dayîk û hem zî bîya pî. Mi lajê xo sax teslîmê înan kerd. Nê ser de zî yenê ma rê tedayan kenê. Eştî serê keyeyê kênaya mi. Birayê ci pers kenê. Vanê şima biwazê ma eşkenê bîyarê. Lajê mi leşkerî de vindî bi. Ez çapemenî ra musaya ke lajê mi dinayaya xo bedilnayo. Ez ameya Colemêrg. La vatî ke cenaze tîya nîya. Ez cenazeya lajê xo wazena."

 

'Ma do taqîbkerdoxê prosesî bê' 

 

Hemsereka MEBYA-DERî Gulîstane Onver zî derheqê muracatî de qisey kerd û va: "Muracat, seba ma girîng o. Ma do zî bibê taqîbkerdoxê nê prosesî."