Dîlan Babat

 

WAN - Hemşaredara Erdîşî ya HDPyî Yildize Çetîn ke qayûm tayînê vera ci bî û ameye tepiştiş, seba xebatanê cinîyan û şaredarî  sûcdar ameye vînayene û tepiştene. Roniştişê dewaya aye 8ê teşrîna verêne de yo.

 

Partîya Demokratîke ya Şaran (HDP) weçînayîşê 31ê Adara 2019 de 65 şaredarî qezenc kerd. Tewr peyîn 2ê teşrîna verêne de qeyûm tayînê şaredarîya Qersî ya HDPyî bi û pêwa nê 48 şaredarîyê HDPyî ke qeyûm ameyo tayînkerdene. Nînan ra yew zî şaredarîya Erdîşî ya Wanî bî. 2016 de wextê qeyûmê ewil de Yildize Çetîn hemşaredara DBPyî ya Payîzava bî û dimayê qeyûm tayîn vera ci bibi, 7 mengî tepişte mendebî. Weçînayîşê 2019 de seba hemşaredarîya Erdîşî ameye weçînayene. Yildize 22ê teşrîna verêne 2019 de qeyûm tayîn vera ci ame kerdene û ameye tepiştene. Xebatê cinîyan falîyetê şaredarî yê wextê hemşaredarî sey sûc ameyî hesibnayene û roniştişê aye 8ê teşrîna verêne de bêro vînayene.

 

Heta 15 serrî ceza yena waştene

 

Yildize ke zîndanê Tîpê T yê Wanî de mendêne surgunê zîndanê Tîpê T yê Osmanî ame kerdene. Serdozgerîya Komare ya Wanî derheqê Yildize û 11 kesê bînan de bi îdiayê, "rêxistinbîyayîşê cinîyan de ca girewtê, rêxistine rê endaman peyda kerdê û bi rêxistine dir pêvînayîş kerdê." Îdianame amade kerd. 7in Dadgeha Cezaya Giran ya Wanî îdianame qebûl kerd û derheqê Yildize û kesê bînan de bi îdiayê, "endamîya rêxistine", "propagandê rêxistine kerdê", "caardişê kombîyayîş û çalakîyê hemverê qanûnî", "hetkarîya rêxistine" heta 15 serran ceza waşt. Dosyaya Yildize û kesê bîn zî visnayî û çarçewaya dosyaya ke ameye visnayene de do Yildize 8ê teşrîna verêne de reyna vejîya mehkema.

 

Xeylê xebatî kerdî

 

Hemşaredarê Erdîşî yê Wanî ke qeyûm tayînê vera înan amebi kerdene, projeyê partîya xo de cinî esas girewtene Erdîş de ca ardî. 6 mengan serê wezîfeyî de mendî û nê prosesî de meymanxane, verê nexweşxanî de seba kesê ke vindenê vilakerdişê şorba û xeylê faliyetê bîn, verê nê de xeta têkoşînî hemverê şîdetê serê cinîyan awan kerdî. Reyna beşêk pîl ê bendeyê qeraxê Erdîşî cinîyan rê visnayî û seba ke cinî berardişê xo biroşê, wareyê îstîhdamî awan kerdî. Yew nê wareyê îstîhdamî zî atolya tekstîlî bî.