ENQERE - HDPyî qerarê tewrnêbîyayîşê Heyetê Pêroyî girewt û bexçeyê Meclîsî de dest pê çalakîya roniştişî kerde.

 

Hemserekanê Partîya Demokatîke ya Şaran (HDP) Pervîne Buldan û Mîthat Sancarî vera operasyonê qirkerdişê sîyasîyî yê vera HDPyî Meclîs de kombîyayîşê çapemenî kerd.

 

'Do rêça îşkenceyî nêeşkê binimnê'

 

Pervîne Buldan, verî ard ziwan ke ê do sey HDPyî seba ke qetilkarê Servet Turgutî yo hetê leşkeran ra pê îşkenceyî helîkopterî ra ame wareştene û qetilkerdene, bêrê cezakerdene do çîyo ke destî ra bêro bikerê.

 

'Operasyonê heyfgirewtişî dewam kenê'

 

Pervîne operasyonê qirkerdişê yê vera partîya ci sey ''qesasê sîyasîyî'' name kerd û vat: ''Nê operasyonî huqûqî nîyê, darbeya sîyasîye ya îqtîdarê AKP-MHPyî ya. Îqtîdar çend vînî keno zafêr hêriş keno. La şima se kenê bikerê nê nêeşkenê verê HDPyî bigerê. HDP qelaya demokrasyî ya. Na qela nêkewt û do nêkewo. Ganî herinda HDPyîjan de berpirsîyar û qetilkarê sûcanê Roboskî, 5ê Hezîrane, Pîrsus, Anqara, Soma, Çorlu, Sakarya, Afyon û îşkenceyê helîkopterî, diznayîşî bêrê destbenkerdene.

 

'Embazê ma wa bêrê veradayene'

 

Pervîne dîyar kerd ke ganî peynîya destbendkerdiş û tepiştan bêro û vat: "Embazê ma yê ke nezaret de yê wa cade bêrê veradayene. Eke cesaretê şima esto bêrê ma cade Meclîs de semedê 6-8ê teşrîna verêne komîsyonêk ronê û raştîyan vejê werte.''