MÊRDÎN - Hemsereka DBPyî Mêrdînî ya verê Leyla Bozkurt, dimayê 14 mengî tepiştişî 7ê êlule de ameye veradayene û şert û mercê zîndanî qalî kerd. Leyla vengdayîşê hîsgêrî kerd û va, hepsî tecrîdêk giran ciwîyenê.

 

Hemsereka DBPyî demê vîyarte ya Mêrdînî Leyla Bozkurt, temmuza 2019 de bi sebebê endemîya rêxistine ameye tepiştene û 7ê êlule de ameye tahlîyekerdene. Leyla ke Mêrdîn û Amed de zîndan de mende, dimayê 14 mengan dima ameye veradayene.

 

'Seba sîyasetî ma tepişnayî'

 

Leyla, dîyar kerd ke prosesêk ke polîtîkayê teda pelçiqnayîşî ameyîne ciwîyayîş de xebatê sîyasî de ca girewta û seba ke sîyaset kerda ameya tepiştene. Leyla wina dewam kerd: "Ma xebatkarê wareyê sîyasî bî la ma sey potansîyelê sûc ame vînayene. Ma serê nameyê partîyêk sîyasî xebate ker la nêzdîbîyayîşê hemverê partîyan zî vuryeno."

 

'Zîndan de her ware de tecrîd ameyîne kerdene' 

 

Leyla ard ziwan ke prosesê tepiştişî de zaf rastê bêhuqûqîyan ameya û hepsî her ware de rastê tedayan ameyîne.  Leyla wina va: "Problemê werdî zaf zêde bi. Domanêk/e 4 serrî verê ma de bi/î. Zaf probleman ciwîyayîne. Ma ameyî tepiştiş û dima ra ma surgunê Amedî kerdî. O wext zaf problemî estbî. Heqê hepsîyan ê sereyîn zî nêameyîne dayene. Domanêk/e 4 serrî estbi/î. Werdo baş nêdayîne. Doman/e bi muz yan zî konservêk rojê xo qedênayîne. Ma na babete de bi îdareyî dir her wext munaqeşe kerdêne. Hepsî binê tecrîdêk pîlî de bî. Prosesê pandemî de no zaf giran bi."

 

'Xizmetê weşîye nêameyîne dayene'

 

Leyla veng da ke ganî şert û mercê bîyaye bêrê sererastkerdene û wina vat: "Hepsî bi pandemîye dir rastê şertê hîna giran ameyî. Nê şertan de mecbûr ê cuya xo dewam bikerê. Ma xo nêresnayîne doktoran. Seba pandemî sewq nêameyîne kerdene. Çîyêk bibayîne zî bi saetan ambulans nêameyîne. Ma vatêne Homa nêkero çîyêk nêro sereyê ma. Ganî şertê hepsîyan bêrê başkerdene. Ganî ma bibê vengê hepsîyan."