MEXMÛR - Reaksîyon û nêrazîbîyayîşê hemverê destbendkerdişê sîyasetmedaran dewam kenê. Cinîyê ke Mexmûr de ciwîyenê, destbendkerdişan şermezar kerdî û vatî: "Îqtîdarê Tirkîya tu wext bi hêrişan nêreseno amancê xo. La do şarê Kurdî zî do her wext hemverê hêrişan xo ver bidê."

 

Serdozgerê Komara ya Enqereyî çarçewaya cigêrayîşê derheqê çalakîyê Kobanî ke 6-7ê teşrîna verêne 2014 de amebî kerdene, dabî destpêkerdene û 25ê êlule de 7 şaristanan de qerarê destbendkerdişê 82 kesan dabi. Reaksîyon û nêrazîbîyayîşê hemverê operasyonê sîyasî her ca de dewam kenê. Derheqê babete de welatîyê Wargehê Multecîyê Şehîd Rûstem Cûdî (Mexmûr) ercnayîşê xo ajansê ma dir pare kerdî û destbendkerdişan şermezar kerdî.

 

'Xoverdayîşê ma do dewam bikero' 

 

Hediye Çelî, destbendkerdişê sîyasetmedarê Partîya Demokratîke ya Şaran (HDP) şermezar kerd û wina vat: "Erdogan bi zulm û îşkence wazeno ke şarê Kurdî çin bikero, la wa  dewleta tirkî baş bizano ke şarê Kurdî her cayê dinya de vila bîyê û tu kes nêeşkeno Kurdan çin bikero. Seba ke Erdogan peynîya xo vîneno, bi hawayêk xidar hêrişê şarê Kurdî keno. La bi nê hêrişan nêreseno amancê xo. Kobanê de serkewte nêbi, çar parçeyê Kurdistanî de hêrişê şarê Kurd û sîyasetmedarê HDPyî keno. Ma sey şarê Kurdî, her wext pey cuya azad de yê û nêverdenê ke kes xoverdayîşî ma ra ma dûr bifîno."

 

'Hemverê îxanetî ganî ma bibê yew'

 

Sarya Kaya nêrazîbîyayîşê xo nê vatişan ser o qalî kerd: "Dewleta Tirkî hemverê sîyasetmedarê HDPyî hêrişik kena û wazena serê tarîyê xo bigîro û çimê şarê kurdî bitersno. Bi hemkarîya DAÎŞî hêrişê erjê şarê Kurdî Kobanê kerd. Seba ke Kobanî de serkewte nêbî û zana ke peynîya ci nêzdîya, bi sûcdarkerdişê serewedaritişê Kobanî dir hêrişê HDPyî kena. La bi destbendkerdişan şarê Kurd û sîyasetmedarê HDPyî nêeşkena biresa amancê xo û qetî nêeşkena şarê Kurdî bitersna. Ez veng dana pêro Kurdan wayîrê şarê xo vejîyê. Meverdê ke dişminî mîyanê ma de biciwîyê. Seba ke ma çar parçayê Kurdistanî pîya biciwîyê lazim o ma bibê yew û ma îxanet şarê xo rê nêkerê."