WAN - Sekretera Cinîyan a Egîtîm Senî ya Wanî Funda Bozkurt dîyar kerd ke mekteban de testê pozîtîf zêdeyê û verê ke seba mamosteyan test bêrêkerdene dest bi perwerde ameyo kerdene û vat: "Netîceyê cigêrayîşî de ame vînayene ke tedbîrê seba perwerdeyê rî bi rî zaf bi qels ê. Ganî perwerdeyêke têduşt, xo seperneno ziwanê dayîke bibo."

 

Seba vîrusê Koronayî menga adare de perwerdeyê dûrî ra amebi destpêkerdene û serê Torra Neqlkerdişê Perwerdeyî (EBA) dersî ameybî dayene. Bi hezaran wendekarî seba îmkan çinbî, nêeşkayî perwerde bigîrê. Serra newe yê perwerdeyî ya 2020-2021 de dest pêkerd û sîstemê EBAyî roja ewil de xira bi. Wezîrê Perwerdeyî Zîya Selçûk derheqê qûtbîyayîşê EBAyî de vat, 'No çîyêk baş o, aseno bi sedhezaran mamoste û wendekarî EBAyî xebitnenê.' Sekretera Cinîyan ê Şubeyê Wanî ya SESî Funda Bozkurt dîyar kerd ke EBA wayîrê bingeyêke xurt nîyo û seba perwerdeyê rî bi rî tedbîrê ke ameyê girewtene, qîm nêkenê.

 

'Mekteban de vîrus zêde yo'

 

Funda dîyar kerd ke prosesê pandemî de plansazîyê ke wezaretê perwerdeyî seba perwerdekerdişî problem bi û vat: "Ma ferqê ci de yê ke perwerdeyî ra qûtbîyayîş, kêmîyê metaryalan, muhtewaya perwerdeyî qels keno û karkerîyê domanan zêde bîyo. Ma înan ra vat eke pandemî biko binê kontrolî, kêmîyê metaryalan bêro çareserkerdene, mekteban de hîjyen bibo do bêrê çareserkerdene. La bi qasê ke ma vînenê hîna ma tîya ra dûr ê. Ma dî ke hîna tedbîrê lazim nêameyî girewtene. Mekteban ke Egîtîm Senî tespît kerdê testê pozîtîf hîna zede yê. Xeylê cayê welatî ra zanayîşê ke testê pozîtîf estê ame ma rê."

 

'Sey yeno vatene perwerdeyî wina baş nîno neqlkerdene'

 

Funda, problemê wendekeran wina rêze kerd: "Xeylê wendekarî vanê, ‘kota mi pirr bî', ‘Ez nêeşkena xo biresnê EBAyî’, ‘kompîturê mi çin o', ‘Telefonêk ma esto o zî bi pîyê mi dir o, pîyê mi şan de yeno.' EBA roja ewil qût bi. Ma roja ewil de vanê, EBA wayîrê bingeyêk baş nîyo. Yanî sey yeno vatene perwerde wina bi program derbaz nêbeno."

 

'Ganî perwerdeyêk xo seperneno ziwanê dayîke û têduşt bibo' 

 

Funda peynîya qiseykerdişê xo de dîyar kerd ke ganî perwerdeyêk xo seperneno ziwanê dayîke bibo û vat: "Ma vanê ke dimayê ke vîrus kewt binê kontrol, ganî perwerde rî bi rî bêro dayene. Aseno ke perweredyê rî bi rî mimkun nîyo. Nê prosesî de ganî problemê  metaryalan, bingeyê EBA û kar û barê onlîne bi ca bêrê. Ganî pêro domanî bi hawayêk têduşt xo biresnê perwerdeyî."