RIHA - Aktîvîsta TJAyî Cahîde Udum derheqê kampanyaya TJAyî ya ‘Ma xo pawenê’ ser o qisey ker dû dîyar kerd ke bi kampanya reyde Riha de do rêxistinêk cidî bi ca bêro û vat, rêxistinbîyayîş hêzê pawitişê cewherî yo.

 

Tevgerê Cinîyê Azad (TJA) 14ê êlule de bi sloganê, ‘Ma xo pawenê’ de kampanya da destpêkerdene û şaristanan de startê ci dewam keno. Riha de zî startê ci ame dayene. Aktîvîsta TJAyî Cahîde Udum, derheqê kampanya de ercnayîş kerd.

 

‘Rêxistinbîyayîş hêzê pawitişê cewherî yo’

 

Cahîde dîyar kerd ke Tirkîya de cinî her wext yenê kiştene û tena menga tebaxe de 21 cinî ameyê qetilkerdişî û vat: Hêrişê sîstematîk bîyê. Yewin rayîrê pawitişî rêxistinbîyayîşî yo. Rêxistinbîyayîşê hêzê pawitişê cewherî yo. Bi rayberîya TJAyî kampanya ‘ma xo pawenê’ ame destpêkerdene. Ma zî sey lingê kampanyaya Rihayî, wayîrê kampanya xo vejenê. Demê peyîn de kiştişê cinîyê ciwanî vejîyayî vernî. Serêkanî de cinîyêk hetê birayê xo ra ameye qetilkerdene. Pirsûs de reyna cinîyêk 19 serrî ya 6 mengî digane întîxar kerd.”

 

‘Kampanya zaf girîng a’

 

Cahîde dîyar kerd ke vernîya kiştişê cinîyan nîno girewtene û bi desan cinî hetê camêrdan yenê qetilkerdene û vat: “Eke biwazê vernîya nê çîyan bigîrê do qanûnan bi ca bîyarê. Ma kampanya TJAyî girîng vînenê. Ma paştdayîş danê kampanya. Riha de polîtîkayê serdest yê camêrdan yeno kerdene. Cinî yenê tersnayîş. Seba nê zî cinî her ware ra yenê dûrfistiş û nînê vînayene. Seba nê zî rêxistinbîyayîşê cinî do Rihayî vernîya serewedaritişêk cidî abikerê.”

 

‘Rêxistinbîyayîşêk cidî esto’

 

Cahîde dîyar kerd ke dewlete serê hîn eşîran de qirkerdiş kena û vat: “Dewlete bi destê xo nêkero zî bi destê eşîran qirkerdiş kena. Ma kewtê demêk ke serê her kesî teda esto. Ma vînenê ke hemverê faşîzmê AKP-MHPyî rêxistinbîyayîşêk cidî esto. Hedefê ma oyo ke ma bi kampanya ‘ma xo pawenê’ ber bi ber bigeyrê û cinîyan rêxistin bikerê. Tu cinî tena nîya û cinî bi rêxistinbîyayîşî eşkena her çî bikero.”