Rojda Aydin

 

ŞIRNEX - Keyeyê hepsîyan, reaksîyon reaksîyon hemverê îhlalkerdişê heqan ê zîndanan dayî û vatî: "Zîndanan de teda û zordarîyê hemverê domananê ma peynî nêbeno. Ma nê caardişan şermezar kenê û vanê, domananê ma serbest vera bidê."

 

Zîndanan de caardişê bêhuqûqî yê hemverê hepsîyan roj bi roje zêde benê û dewam kenê. Bi taybetî zî bi prosesê şubeyê vîrûsê koronayî dir tedayê bîyayeyî di qatî zêde bî. Keyeyê hepsîyan ke bale antî serê caardişê bêhuqûqî yê hemverê hepsîyan û waştişê edaletî kerdî.

 

Dayîka hepsî bi nameyê Zeynep Mete ke 3 serrî tepişte ya û serrêke Zîndanê Sîncanî yê Enqerî de yena tepiştene, Rahîme Mete bale ante serê rewşa kênaya xo û wina vat: "Kêna mi bi hîrê serrî yo tepişte ya. Bi temamî 9 serrî cea ci rê ameya birnayene. Dosyaya aye de zî tu çîyêk çin o. Kêna mi verê bi serrêk Zîndanê Şirnexî de bî, la dima ra surgunê Zîndanê Sîncanî ameye kerdene. Bi no hawa wazenê, ma ceza bikerê. Seba nêweşîye ma nêeşkenê şêrê pêvînayîşê aye. Bi serrêke yo mi kênaya xo nêdîya. Ma tena bi rayîrê telefonî yewbînan dir qisey kenê, o zî sînorkerde yo. Kêna mi vana, 'ez  baş a.' La ma nêzanê ke rewşa aye senîn a."

 

'10 rojan cezaya hucreyî dayî' 

 

Rahîme, dîyar kerd ke verê bi aşmêk cezaya 10 rojan hucreyî ci ame birnayene û vat: "Ma nêzanê ke seba çi cezaya hucreyî dayê. Zîndanan de zî ceza înan ra ameye birnayene. Ma nêeşkenê domananê xo bivînê. Şube esto, pêwa nê hacetê pakitî tay yenê dayene.  Vera ke her roje hacetê paketî bidê, hewte ra hewke danê. Seba rewşa vîrusê Korona cuya înan tehluke de ya. Ganî waştişê tepişteyan bêrê qebulkerdene. Dewlete senîn edlî vera dayî, wa tepişteyê sîyasî zî vera bidê. Ma wazenê domanê ma serbest bêrê veradayene."

 

'Ca zîndanan de nêmendo'

 

Dayîka Kumru Tokaya ke Zîndanê  Tîpê E yê Amedî de ya Ayşe Tokaye zî dîyar kerd ke kênaya aye bi di serrî yo zîndan de ya û vat: "Dimayê ke kênaya mi ameye tepiştene, grevê vêşanîye ameyî destpêkerdene. Aye zî 1ê Adare de kewte grevê vêşanîye. Ma dayîkî bi tena weşî û azadî wazenê. Seba nê bi serran o, ma têkoşîn kenê. La ewro domanî, cinî û dayîkî zîndanan de yê. Êdî zîndanî hende pirr bîyê ke ca înan de nêmendo."

 

'9 serrî û 8 mengî ceza kênaya mi rê ameye birnayene' 

 

Ayşe, dîyar kerd ke zîndanê Amedî de domanê înan problemê awe ciwîyenê û vat: "9 serrî û 8 mengî ceza kênaya mi rê ameye birnayene. Kênaya mi nêzdîyê 6 mengî Zîndanê Şirnexî de mende û dima ra surgunê Zîndanê Cinîyê yê Amedî ameye kerdene. No demêk derg o seba nêweşîye ma nêeşkenê şêrê pêvînayîş. La verê vîrusî, gama ke ma şîne zîndan cigêrayîşê viran kerdêne. Sewbîna zîndan de problemî estê. Kênaya mi bi rayîrê telefonî ma geyrayî vat, 'qawişê kîşte ma xeylêk kes bi vîrus kewtê.' Zîndanê Amedî de nêweşî vila bena. Ma seba domananê xo bi endîşeyê. Hewte ra reyke awe danê înan. Kênaya mi vat, ê awe pê qawiş pak kenê û awe înan rê nêmanena. Seba ke ma nêeşkenê şêrê pêvînayîş, pêro probleman qal nêkena. Zîndan de maske û dezenfekte nîno dayene. Ê bi îmkananê xo gênê."

 

'Ma tena azadî û aştîye wazenê' 

 

Ayşe, tewr peyîn wina vat: "Ma tena azadî û aştî wazenê. Ma wazenê teda û zordarî peynî bê. Vengdayîşê mi pêro dayîkan rê û dest bidê destê yewbînan ma wayîrê domananê xo vejîyê. Wa domananê ma serbest vera bidê. Ma êdî nêwazenê ke dej biancê. Çi heqê înan esto, nê çî kenê. Tecawuzkaran vera danê, hepsîyê sîyasî vera nêdanê. Wa domananê ma serbest vera bidê."