AMED - Cinîya bi nameyê Z.M ya ke rastî şîdetê polîs H.A,yî amebî û welatîyê bi nameyê A.E û Ç.Y hewl dabî ke vernîya şîdetî bigîrê. H.A no ser ‘mukavetê polîs’ gerre kerd. H.A û Z.M her çiqas vajê, ‘ma pîya yarîye kerdêne zî' raporê kesê zaneye de şîdet ame belgekerdene.

 

Qezaya Baglarî ya Amedî de 27ê Temmuze de cinîya bi nameyê Z.M, hetê embazê xo yê polîs H.A ra rastê şîdetî ameye. Ciwanê bi nameyê A.E û Ç.Y yê ke şahidîyê hedîse bî, hewl dayî ke vernîya şîdetî bigîrê. H.A yo ke polîs bi, derheqê ciwanan de ‘mukavetê polîs kerd’ gerre kerd. Ciwanê ke şî îfade zî dîyar kerdî ke polîs H.A şîdet cinî rê kerdo û hewl dayê ke vernîya ci bigîrê la H.A ê tehdîd kerdo û gerre kerdo.

 

No ser de derheqê H.A de sûcê ‘bi çekê tehdîdkerdiş’ îdianame ame amadekerdene û derheqê A.E û Ç.Y de zî sûcê ‘birîndarkerdişê asan’ îdianame de ame amadekerdene û cîya cîya ceza ameye waştene.

 

Şîdet kamera de ame vînayene

 

Verê îdianameyî de tehqîqato ke ame kerdene de, H.A di îfadeyê xo de wina vano: "Z.M embaza min a. Ma xo rê yarîye kerdêne, mi da piro. Reyna bi yarîye mi porê aye ant. Ma wina yarîye kerdêne û di kesî ameyî hêrişî mi kerdî.”

 

La raporê kesê zanayene de vatişê H.A pûç kenê. Raporê ke ame amadekerdene de ame vînayene ke şîdet ameyo kerdene.

 

'Ma hewl da ke ma cinî ey ra dûr bifînê'

 

A.E îfadeyê xo de vat: "Ma verê kargerî de ronişte bî. Cinîyêke ameye derbkerdene. Camêrdêk aye rê heqaret ci kerdêne. Ma şî ver û ma Z.M, verê H.A ra dûr fîna. Senî ma şî ê yewbînan ra visyayî. Dima ra camêrdî vat, ‘şima kam ê? Şima rê çi? Aye waştîya min a.' Heqaret kerd. Dima ra êi çekê ey dî. Dima ra mi karde xo vet, la karde mi xira bî. O ten çekê xo vet û gule vera da hewa. Dima ra polîsî ameyî. Ma her çî polîsan ra vat. Mi karde xo bi waştişê xo da polîsan. Mi kesêk birîndar nêkerd. Tena teşqele vejîya. Mi wezîfeyê xo hemwelatîye kerd. Cinî rewşêke zehmet de bî. Ma şî verê aye."

 

Ç.Ayî zî îfadeyê xo de wina vat: "Senîn ma hedîse dî, ma şî verê înan. Embazê mi zî kewt mabêne cinî û camêrdî ke zirar nêdo cinî. No ser camêrdî heqaret kerd û gule varna. Vanê ma yarîye kerdêne. La yarîye nêbî. Qîrayîne serê yewbînan de. Ma dest nêda o kesî. Tena ma înan yewbînan ra dûr fîna. Ez nê îftereyan qebûl nêkena. Xora kamerayan de zî do her çî vejîyo werte."

 

Z.M zî şîdet qebûl nêkerd

 

Z.Mye zî îfadeyê xo de dîyar kerd ke H.A. embazê aye yo, pîya yarîye kerdêne. La her çiqas wina vaja zî kamerayan de ame vînayene ke rastê şîdetî ameya.

 

Seba hîrê kesan cîya cîya ceza ameye waştene

 

Dimayê tehqîqato ke hetê serdozgerîya Komare ya Amedî ra îdianame ame amadekerdene û derheqê A.E û Ç.A de sûcê ‘birîndarkerdişê asan' 4 mengî ra heta serrêke, derheqê H.A de zî sûcê, ‘Bi çek tehdîdkerdiş’ 3 mengan ra heta 2 serran ceza ameye waştene.

 

Îdianame hetê 13in Dadgeha Cezaya Asliye ya Amedî ra ame qebulkerdene û roniştişê yewin do 22ê êlule de bêro vînayene.