WAN - Endama OHDyî avûkat Ekîn Yetere, dîyar kerd ke îdareyê zîndanê Tîpê F yê Wanî seba hepsîyê ke vanê, ‘bi tehluke yê’ nan tay danê û yew waştişê hepsîyan oyo ke nê caardişî bêrê wedarnayene. Ekîne dîyar kerd ke ganî STO, hemverê grevê ke ameyê destpêkerdene de xorexnedayîşî nêzdî bibê.

 

Zîndanê Tirkîya de îhlalkerdişê heqan dewam kenê. Zîndanê Tîpê F yê Wanî de hepsîyê sîyasî hemverê caardişan dest bi grevê vêşanî kerdî. 14ê êlule de ame dîyarkerdene ke do her rey 9 kes, 10 rojan bi hawayêk dore bikewê grev. Waştişê hepsîyan oyo ke caardişê wextê OHALî de kewtê dewre û hîna yenê dewamkerdene peynî bê.

 

‘Qedehêke awa cilan danê’

 

Ekîne dewam de dîyar kerd ke rejîmo sîyasî demêko vîrus sey metod xebitneno û vat: “Ma nê serdayîşê zîndanan de dî. Hepsîyan tecrîd kenê û înan wazenê bêveng verdê. Destpêkê vîrusî ra heta nika ma 5-6 rapor weşêna. Ma serê vatişê hepsîyan de tespîtê xo kerd. Caardişê kêfî estê. Nimûne maske û lepik her wext nêameyîne dayene. Odayê pêvîvayîşî menga ra reyke yenê dezenfektekerdene. Seba odayê 20 kesî de manenê, çend rojan ra reyke awa cilan yena dayene.”

 

‘Ganî ma xorexneyî nêzdî bibê’ 

 

Ekîne sewbîna va ke binpaykerdişê heqan demêko derg o dewam keno û wina vat: “Grevê vêşanîye rewşa binpaykerdişê heqan vejeno werte. Çira çalakîyê bîn ney, çira grev? Ganî ma nê cigêrayîş bikerê. Ganî rêxistinê komelî yê sivîl xorexnedayîş ser o nêzdî bibê. Waştişê hepsîyan bi hawayêk xurt xo teber de ramojneno. Coka kewtî grevê vêşanîye.”

 

‘Nan tay danê’

 

Ekîne bale ante serê waştişê hepsîyê ke kewtê grev û vat: “Zîndanan de ma vatişê sey ‘bi tehluke yo’ vînenê. Rewşa îzolekerdişî yê nê hepsîyan babeta vatişî ya. Bi hepsîyê bînan dir têkilîyê înan çin o. Vanê ke bi ‘tehluke’ û nan kêm danê. No zî hemverê metodê têduştî yo. Ti het ra qanûnî nîyo.”

 

‘’Ferzkerdişê waştişnameyê poşmanî esto’

 

Ekîne peynîya qiseykerdişî de waştişê hepsîyan rêz kerd û wina vat: “Mîyanê waştişan de vurnayîşê odayan, dayîşê weşanê kurdkî û sewbîna vindarnayîşê ferzkerdişê waştişnameyê poşmanî estê. Heqê hepsîyan esto ke odayanê xo bivurnê. Hepsî nê rewşa zehmet de xebitnenê. Kitabê kurdkî nînê dayene. Serê ziwanî de teda esto. Bi mengan kitabêk Kurdkî yeno cigêrayîş û nîno dayene. Heqê hepsîyan heqdar û meşrû yo.”