MÊRDÎN - Komeleya Kultur û Hunerî ya Mezopotamya, seba pandemî mabêne dabî qursê xo dersê ci reyna dest pêkenê. Kudret Uçuka ke mamosteya komeleye ya, veng da Mêrdînijan û vat: “7 ra heta 70î ma perwerde danê her kesî. Kesê ke muzîk ra hes kenê zî wa qeydê xo viraznê.”

 

Komeleya Kultur û Hunerî ya Mezpotamya ke Qoserê Mêrdînî de xebatanê xo kena, seba pandemî mabêne dabî. Nika seba demo ameyoxî amadekarîyê xo kena. Qursê gîtar, saz, keman, erbane û govende yê ke ameyîne dayene, do menga teşrîna verêne de reyna dest pîbikerê. Mamosteya komela Kudret Uçuke, veng da ciwananê Mêrdînijan ke beşdarê qursan bibê.

 

‘Ma perwerdeyî onlîne da’

 

Kudrete dîyar kerd ke komeleya ke serra vîyarte ameya akerdene, ci de perwerdeyê muzîk û estrumanî ameyê dayene û vat: “Ma zaf wareyê hunerî de perwerde da. Xeylê mamosteyî dersan danê. Govende ra heta keman, xeylê qursê ma û bi desan wendekarê ma estê. Verê menga adare xebatê ma bêmabên dewam kerd. Seba vîrusî, ma mabêne da û ma dima ra zî dersanê xo onlîne da.”

 

‘Teşrîna verêne de dest pêkeno’

 

Kudrete dîyar kerd ke dersê înan menga teşrîna verêne de dest pêkenê û wina qedêna: “Dimayê prosesê normalbîyayîşî ma qeydê neweyî girewtî. Ma do menga teşrîne verêne de dest bi dersanê xo bikerê. Ma pêro şarê xo dawet kenê. 7 serran ra bigî heta 70an serran rê ma derse danê. Kesê ke eleqeyê înan bi muzîkî dir esto eşkenê qeydê xo viraznê.”