WAN - Cinîyê ke baxçeyê xo bi kedêk pîl sebze ramitî, nika dest bi arêdayîşê ci kerdê û seba werdê organîk û weşîye amadekarîya zimistanî zî kenê û paştdayîş danê ekonomîya keye.

 

Bi ameyîşê payîzî dir amadekarîyê zimistanî zî dest pêkerd. Xeylê cinî bi sebze û fêkîyê baxçeyê xo ramnenê, konserve, tirşî, awa firingîyan û sebzeyê wişk viraznenê. Soylemez Pazar û Medîne Pazare ke taxa Sixkî ya Tuşba ya Wanî de ciwîyenê, dîyar kerdî ke karê baxçeyî zehmet o la werdê ci organîk o.

 

‘Amadekarîyê mi heta hamnanî qîm kenê’

 

Soylemeze dîyar kerd ke menga nîsane de sebzeyan ramnena û bi dîqet ewnîyena baxçeyê xo ra û vat: “Darê ma yê xewxan zêde yê. Ma xewxan wişk kenê. La karê ci esto. Ma sebze û fêkîyê wişkan roşenê. Sewbîna ma zî sebzeyan ra konserveyan viraznenê. Heta mewsîmê hamnanî qîm keno. Ez serê sibayî rew şîne baxçe. Sebzeyê ma organînik ê. Ez hormon û zibil nêxebitnena.”

 

‘Vayîya awe her roje zêde bena’

 

Soylemeze dîyar kerd ke beşêko pîl ê qezencê xo dana fatureyê awe û bale ante serê awe û ceyranê ke zaf yeno û vat: “Ez 5 mengan baxçe awe dana. Her menge 500 TL fature dana. Awe keyeyî zî cîya dana. Beşêk pîl ê qezencê xo dana awe û ceyran. Sewbîna zî her wext zem yeno kerdene.”

 

‘Ma pê debara xo zî kenê’

 

Medîne Pazare zî dîyar kerd ke bi sebze û fêkîyê baxçeyê xo debara xo kenê û baxçeyê xo ra feyde gênê. Medîne wina vat: “Ma wisarî toxim erzenê. 3 mengan ewnîyenê. Dima ra arêdanê. Ma sebze û fêkîyê xo roşenê. Ma awa firingîyan û konserve viraznenê. Karêko zehmet o la ez ci ra hes kena. Lane, gilgil, firingî û sebzeyê bînan roşena. Wextê tirşî zî lane roşena. Ma organîk ciwîyenê. Muşterîyê ke yenê baxçe zî çi biwazê gênê û şênê.”