Melîke Aydin

 

ÎZMÎR - Aktîvîsta TJAyî Funda Akbulute dîyar kerd ke hemverê polîtîkayê AKP-MHPyî yê hemverê cinî û domanan bi kampanyaya ‘ma xo pawenê’ xopawitişê cewherî esas gênê û vat: “Prosesê ke xerabî rêze ra bîyo, a ke keweno serê milê ma xopawitişê cewherî yo.”

 

Tevgerê Cinîyê Azad (TJA) 15ê Êlule de startê kampanyaya ‘ma xo pawenê’ Amed de bi beşdarbîyayîşê xeylê cinîyan da. Dimayê Amedî, Îzmîr, Colemêrg, Riha de zî startê kampanya ame dayene û seba bernameyan amadekarî ame destpêkerdene. 

 

Aktîvîsta TJAyî Funda Akbulute derheqê kampanyaya Îzmîrî de qisey kerd û hemverê cinsîyetîyê îqtîdarê AKP-MHPyî û şîdetî, serê girîngîyê pawitişê cewherî vinderte û dîyar kerd ke ê hedef kenê xo biresnê pêro cinîyê hetgêrê têduşt û azadî.

 

Amanc xoresnayîşê heme cinîyan o

 

Funda dîyar kerd ke çarçewaya kampanya esas gênê ke xo biresnê pêro cinîyan û heme ware û taxan de cinîyan dir bêrê têhet û wina vat: “Ma vînenê ke do tarîtî zî bi peynî bo. Ma do bi heme cinîyê hetgêrê azadî û têduştî bêrê têhet. Ma Îzmîr de zî paştdayîş danê sloganê, ‘Cinî Pîya Xurt ê.’ Ma do çalakîyê xo zî pîya bikerê.”

 

‘Oyo ke keweno serê milê ma pawitişê cewherî yo’

 

Funda dewam de wina vat: “He roje cinî yenê qetilkerdene. Kiştoxî yenê pawêtene. Rewşa baş û qanûnî yenê vetene û yenê veradayene. Dewlete hewl dana qezencê cinîyan destê ci ra bigîra. Amancê ma oyo ke her ca de ma cinîyan rêxistin bikerê. Zaf ferz o ke xopawitişê cewherî bêro rêxistinkerdene. Proses de ganî cuyêka newe zî bêro munayîş. Na cuye zî ganî çarçewaya azadîya cinî ya ekolojîk û demokratîkî bi ca bêra.”

 

‘Pawitişê cewherî cinîyan paweno’

 

Funda tewr peyîn wina vat: “Nimûne ma vanê Pêameyîşê Stenbolî. Ameyîşê şarî têhet, xopawitişê cewherî yo. Ameyîşê têhet xurt keno û qerardayîş xo dir ano. Ez veng dana pêro kesan ke yewîya şaran pawenê, aştî û têduştî pawenê ke wayîrê kampanya vejîyê.