AMED - Bi destpêkerdişê menga Êlûle dir arêdayîşê fistiqan zî ame destpêkerdene. Dewa Xirbizilî ya girêdayê qezaya Çinarî ya Amedî de zî karkeran dest bi arêdayîşê fistiqan kerdî. Karkerê ke serê sibayî rew yenê baxçeyê fistiqan û germbîyayîşê hamnanî dir heta şan de heqdestêko kêm xebityenê.

 

Fistiqî yew darê benîştokan û fêkîyan ê. Darê fistiqan hem seba berardişî û hem zî seba ekonomî wayîrê taybetmendîyêk girîng ê. Pîlkerdişê darê fistiqan kedêke pîl wazenê. Fistiqî gama ke resenê, kakilê xo pirr kenê. Arêdayîşê fistiqan menga Êlûle de dest pêkeno. Dewa Xirbizilî ya girêdayê qezaya Çinarî ya Amedî zî karkeran dest bi komkerdişî fistiqan kerdî. Karkerê ke serê sibayî rew şonê baxçeyê fistiqan germbîyayîşê hamnanî yê Amedî de heta şan de bi heqdestêk tay xebityenê. Cinîyê ke nê karî kenê derheqê zehmetîyê arêdayîşê fistiqan ajansê ma rê qisey kerdî. Gorey hîn kesan no kar goreyê karo bîn hîn asan o, la goreyê hîn kesan zî zehmetîyê nê karî zî zêde yo. Hîn cinîyê karkerî zî seba zêdebîyayîşê kar nêeşkayîne qisey bikerî.

 

Berfîn Şenole (19) ke 8 serrî yo serê erdan de xebityena wina vat: "Vernê de ma potike binê dare de fînenê ra û fistiqê ke daran ra tira kenê, serê potî de kom kenê. Reyan zî çend embazê ma şonê serê dare û dare weşênenê û ma fistiqan arêdanê. Dima ra ma fistiqê serê potî kenê heqîban. Şan de wexto ke kamyonî yenê tûr, ferd û heqîban gênê."

 

'Germê hamnanî karê ma xidar keno'

 

Dîdem Gultekîne (18) zî 6 serrî yo karkerî kena derheqê karî de qisey kerde û vat: "Mi domanîya xo de dest bi karê paleyî kerd. Xora xeylê kêna û camêrdê dewa ma dimayê mekteba sereyîn fek mektebe ra vera danê û seba debara keyeyê xo dest bi paleyî kenê. Ma her serre karê zîyan û baxçeyê tewir bi tewir kenê. Nika zî wextê arêdayîşê fistiqan o. Germbîyayîşê hamnanî karê ma xidar keno."

 

'Karê fistiqan ê peme ra hîna asan o' 

 

Semanur Gunduze (19) ke 7 serrî yo paleyî kena ke hem fistiqan arêdayîne û hem zî ma rê qalî kerdêne. Semanure wina vat: "Arêdayîşê fistiqan karê bînan ra hîna asan o. Ma dimayê karê fistiqan, şonê peme arêdanê. Karê fistiqan goreyê mi karo bîn ra asan o. Karê fistiqan de ma xo war nêkenê û seba ke darî veresî yê zêde tîjî nêdana ma ro."

 

'Xeylê cinîyê ciwanî na dewe de nê karî kenê' 

 

Tuba Tunçe (19) 9 serrî yo karê paleyî kena. Tuba wina vat: "Çi heyf, ma domanê kênayan nêerşawenê mekteban. Coka pêro paleyî kenê. Sey her karî zehmetîyê nê karî estê. Reyan awe çin a, ma no hawayê germ de teyşan manenê. Eke bêro zî awa germ yena. Hawayêk pak esto û ma xoza de ciwîyenê. No zî ma kêfweş keno."

 

'Wextê ma weş derbaz beno'

 

Aysel Gultekîne (24) zî qisey kerd û vat: "Xora cuya ma serê zîyan û baxçeyan de derbaz bena. Nika wextê arêdayîşê fistiqan o. Ez nê karî zaf hes kena. Hem fistiqan wena, hem zî sey karê bîn zêde verê tîjî de nêmanena. Wextê ma baş derbaz beno. Ma pîya yarîyan kenê, sohbet kenê û mîyanê karî de kay kenê û govende kay kenê. No zî beno sebeb ke kêfweşî karê xo bikerê."