ŞIRNEX - Her hoqe kilîme de kede û her neqşî de estanekêke esta. Şirnex de hema zî xeylê keyan de viraştişê kilîman dewam keno. Derya Kabule zî nînan ra yew a û 35 serrî yo ke kilîman viraznena. Derya, dîyar kerd ke çend viraştişê kilîman zehmet bo zî, hende zî weş o.

 

Viraştişê kilîman bi keda destê cinîyan heta ewro gane mendo. Şirnex de xeylê keyan de cinî viraştişê kilîman dewam kenê. Her hoke kilîme de kede û her neqşî de estanekêke esta. Merş û tûrikê ke reng bi reng yenê viraştene, merdiman mest kenê. Taxa Vakif Kentî ya Şirnêxî de Derya Kabule (55) 35 serrî yo kilîman viraznena. Derya, berê keyeyê xo ma rê akerd û qalê kar û barê xo kerd.

 

Derya, dîyar kerd ke aye dayîka xo ra kilîman musaya û wina vat: "Wexto ke domane bîye, dayîka mi her wext viraştêne û mi zî ewnîyayîne ci ra. Verê ma şîne zozanan, dayîka mi zî kilîmê ke viraştêne çadiran de û keye de daliqnayîne. Verê ma şîne zozanan û hem zî hetêk ra zî wayîrê adetê xo vejîyayîne. Gama ke bîne zimistan ma kilîman keye de zî viraştêne. Dayîk û pîrîka mi qetî fek adet û viraştişê kilîman ra vera nêdayî. Ez wexto ke 20 serrî bîya mi dest pêkerd û bi 35 serrî yo ez kilîman viraznena."

 

'Viraştişê kilîman zehmet o'

 

Derya, dewam de wina vat: "Ma dewa Avyanî ra yê û ma serra 90 de seba tedayê dewlete ma dewe ra vejîyayî. Bi 31 serrî yo ke ma ameyê şaristan. Senîn mi dewe de kilîman viraştêne, şaristan de zî mi dewam kerd. Ez o qetî fek viraştişê kilîman ra fek vera nêdî. Verê wexto ke ma koçer bî, ma peşme ra la viraştêne. La nika seba ke ma koçer nîyê, ez şona la gêna û yena viraznena. Ez nê neqşan bi destê xo yew bi yew viraznena. Raştî zî viraştişê kilîman zehmet o, labelê hende zî weş o. Seba ke kulturê ma Kurdan weş o."

 

'Kulturê ma raştî zî zaf dewlemend o'

 

Deryayê, dîyar kerd ke şaristanan de zêde kultur û adetî nînê ciwîyayîş û vat: "Cuya şaristanî, merdiman adetan dûr fînena. Seba nê zî ma wayîrê adetanê xo vejênê û danê ciwîyayîş. Ewro gama ke merdim ewnîyeno adet û kulturê Kurdan bi destê cinîyan yeno ciwîyayîş. Cinîyê Kurdî her wext wayîrê kulturê xo vejîyenê. Ganî pêro cinîyê Kurdî wayîrê kulturê xo vejîyê. Kulturê ma raştî zî zaf dewlemend o û ma zî kulturê xo pawenê. Manaya her neqşê ke kilîman de yenê viraştiş cîya yê. Neqşê ke bi destê cinîyan yenê viraştiş, rêça demê verên ana vîrê merdimî."