WAN - Roniştişê Muhlîse Karaguzele do siba bêro kerdene. Muhlîse seba ke nîna tedawîkerdene, beno ke çimanê xo vinî bikero. Kênaya aye Zîlan Karaguzele seba dayîka xo vengdayîşê hîsgêrî kerd û waştişê serbestveradayîşê aye kerd.

 

Goreyê dayeyê Komeleya Heqê Merdiman (ÎHD) yê 2019ine zîndanan de 458 hepsîyê nêweş yê rewşa înan giran a estê û bi temamî zî hezar 334 hepsîyê nêweşî estê. Bi destpêkerdişê pandemî de hepsîyê nêweşîyê înan yê kronîk estê, tewr zêde bi merdişî dir rî bi rî ameyî verdayîş. Înan ra yew zî Hemsereka verê ya Rêxistinê Partîya Demokratîkî ya Şaran (HDP) ya Mûşî Muhlîse Karaguzele (59) ya. 10ê tebaxa 2019 de bi sebebê, "Endamê rêxistine ya" polîsan eşt serê keyeyê Muhlîse û tepiştî.

 

Muhlîse, hem seba emrê xo û hem zî seba nêweşîya kronîkî rewşêke baş de nîya. Muhlîse nika Zîndanê Girewte yê Cinîyan ê Bunyanî yê Kayserî de tepişte ya. Eke Muhlîse nêro emalîyetkerdiş, beno ke çimanê xo vindî bikero. Kênaya Muhlîse, Zîlan Karaguzele seba pandemîyî demêk derg o nêeşkeya şêro pêvînayîş.

 

Zîlane, hîsê û fikrê xo ajansê ma rê qalî kerd: "Tewr peyîn mi dî ke dayîka mi baş nêvînena. Mi dî ke cayê ke ronişteya, nêvînena. 2 mengî verê gerek biameyîne emelîyatkerdiş. Problemê aye giran estê. Goreyê zanayîşê doktorî, ganî reyke bîn bêro emelîyatkerdiş. Seba ke emelîyato ewil baş derbaz nêbîyo. Sewbîna emelîyato diyîn zî seba nêweşîya şekir û tansiyonî zaf bi rîsk o. Roniştişê peyîn de nêamî tehlîyekerdene û reyke bîn aye erşawitî zîndan. Nika zî pandemî kenê sebeb û dayîka mi nêbenê nêweşxane."

 

Zîlane, qiseykerdişê xo de bale ante serê şert û mercê zîndanî û wina vat: "4 nan danê koxuşê ke 10 kesî ci de yê. Hepsî nêeşkenê werdêke baş bigîrê. Werdê ke yenê dayene zî zaf xirab ê û sewbîna zaf tay yenê dayene. Rewşa hepsîyan qet baş nîya. Sewbîna nika dayîka mi, bi hetkarîya embazanê xo lazimîyê xo rojane bi ca ana."

 

Zîlane tewr peyîn bale ante serê Qanûnê Înfazî û wina vat: "Bi Qanûnê Înfazî dir xêrcê hepsîyê sîyasî xeylê kesî serbest ameyî veradayene. Kesê ke ameyî veradayene, reyna eynî sûcî kerdî. Xeylê hepsîyê nêweşî estê û dayîkî bi dayîkanê xo dir zîndan de yê. Na rewşêka baş nîya. Nika rewşa weşîya dayîka mi tehluke de ya. Raporê aye yê nêweşîyê kronîk estê û sewbîna Nêweşxaneyê Dewlete de raporê, 'Nêeşkena zîndan de bimana' dabî la Tibê Edlî yê Stenbolî zî hemverê nê raporî vejîya. No nîno qebulkerdene."

 

Sewbîna do siba roniştişê Muhlîseye 2yîn Dadgeha Cezaya Giran ya Mûşî de bêro vînayene. Zîlane vengdayîşê beşdarbîyayîşê roniştişî kerd.