ŞIRNEX - Xanim Kabula ke dewa Avyanî ya Şirnexî ra ya seba zulmê dewlete, dewa xo ra koçber bîya û cîyayê mabêne verê û nika de ercna û wina vat: "Tu weşîya cuye nika nêmenda û tu kêfweşîyê ci çin o. Cuya nika serê pereyî de ameya akerdene. Coka nê serdemî de vêşanî û feqîrî zêde bîyo. Ma bi hesretê cuya verê û herra xo yê."

 

Verê ke serdemê kapîtalîst aver şêro, cuyêka xozayî estbî. Bi taybetî zî dewan de cuyêka komunal estbi û her kesî lazimîyê xo bi destê xo bi hawayêko xozayî weçînayîne. Çînayîş, kultur, xoza, weşî û cuya xozayî estbî. Verê dewan de şarî, bi pesdewarî û berardiş debara xo kerdêne û no bi hawayêk hempar ameyîne kerdene. La nika xoza roj bi roje mirena û merdimayî, komel ver bi teşqeleyêk pîl şono. Dimayê averşîyayîşê teknolojî û kapîtalîzmî hem xozaya dewana meye çinkerdene û hem zî welatî bê ca û bê war mendî. Sey nê çî qîm nêkenê, hetê dewlete ra dewijî dewna ra yenê vetene. Dayîka bi nameyê Xanim Kabula 82 serrî ke nînan ra yew a û dewa Avyanî Şirnexî ra ya, serrê 90an de seba bibê qorîcî teda serê keyeyê aye de yeno kerdene. Xanime û keyeyê aye ke nê qebul nêkenê, bi zor hetê dewlete ra dewa xo ra yenê vejînayene. Xanime bi 31 serrî yo ke Şirnex de bi ca bîya. Xanime, ma rê qalê cuya verê û nika kerd.

 

'Cuya dewe zehmet bî la weş bî'

 

Xanime, vat ke verê cinî herre zêdeyêr eleqedar bîne û wina vat: "Cuya dewe zehmet bî û feqîrî zaf bî. Verê komele hîna zêde zanaye bî. Ma pêro çi bi destê xo kerdêne. Ma verê şîne zozanan, bi mengan zozanan de mendêne. Ma pes wey kerdêne. Mast, penîr û rûn viraştêne. Ma bax û baxçe çînayîne û hemine bi destê xo pîl kerdêne. Sey ma domananê xo pîl bikerê. Ma verê bêrîvanî kerdêne. Cuya zozanan zaf weş bi. Ma her wext pîya bî û ma pîya karê xo kerdêne. Ma tewrikan bi destê xo viraştêne. Ma genim seba ardan bi destê xo viraştêne. Ma kizwan kom kerdêne û kerdêne qehwe yan zî seba werdêk bîn ma xebitnayîne."

 

'Tu weşîya cuye nika nêmenda'

 

Xanime dîyar kerd ke verê pêwa zehmetîyan, cuye hîna bi mana bî û wina vat: "Pêwa zehmetîyan, cuya verê de hizûr û weşî estbî. Xebata ma zaf bî, la o wext nêweşî kêm bî. Nika nêweşî zaf estê. Verê însanan nêweşîya xo bi dermanê xozayî weş bîne. Nika tu weşîya cuye nêmenda. Nika cuye pêro bîya pere. Verê cereyan çinbi, ma çila fînayîne ta. O wext radiyo estbî, ma xeberan radyo ra taqîb kerdêne. Ma pêro kom bîne, ma deyîran vatêne û hîkayeyan vatêne. Dengbêjê ma estbî. La nika ciwîyayîş asan bîya, la bêmana ya. Verê televîzyonî de êdî domanî estanikan goşdarî nêkenê. Seba ma no serdem hîna tehluke yo, çunke her ke şono xebitnayîşê kurdî kêm beno. Ma şîne veyvan û ma deyîran vatêne û govende kerdêne. No zî ziwanê ma hîna dewlemend kerdêne."

 

'Herra ma seba ma zaf bi qîmet a'

 

Xanime, tewr peyîn wina vat: "30 serrî ra zêdeyêr ez ameya şaristan. dimayê ke ma ameyî şaristan, ciwîyayîş ma rê bi heram. Ma şaristan de nêeşkenê sey dewe biciwîyê. Cuya şaristanî zehmet nîya, la weşîya ci çin a. Nika teknolojî aver şîya la tu çîyêk nîno çareserkerdene. Herra ma seba zaf bi qîmet a. Umîdê mi oyo ke ma rojê azad de şêrê serê herra xo û dewa xo de biciwîyê. Ma bi hesretê herra xo mendê."