AMED - KASED ke bi sloganê, “Bi muhtewayêk pirr yê dersê hunerî, xizmetê cinî û domanê hunerhezan de yo” dest bi xebatê xo kerdî. Muracatê kursan dest pêkerd û mamosteyê KASEDî vatî: "Kursî çarçewaya tedbîran de do bêrê dayene. Ma wazenê ke cinîyê ciwanî verê xo bidê tîya û kursanê ma ra feyde bigîrê.”

 

KASED (Komeleya Kultur û Huner û Edebîyatê yê Cinîyan) bi sloganê, “Bi muhtewayêk pirr yê dersê hunerî, xizmetê cinî û domananê hunerhezan de yo.” Dest bi xebatê xo kerd. KASEDo ke bi amancê hetê kultur û hunerî de xo biresnê cinî domanan ame akerdene, nika zî muracatê qeydê kursê ci ameyî desrpêkerdene. Komela beşê sey; resim, def, govend, pîyano, keman, flut, tembûr, sêtar, gitar, drama û tîyatro de do perwerde bêrê dayene. Sewbîna seba domanê ke emrê înan 2 û 5 serrî de yê, perwerde bêro dayene. Eynî wextî de ziwanê perwerdeyî kurdî yo. Derheqê komele û kursan de mamosteyê komela qisey kerdî.

 

Mamosteya edebîyatî Salîha Ayataye, dîyar kerd ke amancê înan hetê kulturî biresnê cinî û domanan û vat: “Demêk derg o ke ma serê xebatêk winasî de fikrîyenê. Seba ke ma cinî, hîna rew xo biresnê cinîyan. Cinîyê ke îmkanê înan kêm ê û nêeşkenê xo biresnê karê kultur û hunerî. Pêwa nê ma qezaya Rezanî de cayê xo akerd û dest bi xebatanê xo kerd. Ma waşt ke qeza de xebatanê xo bikerî, seba ke sazgehêk kulturî çinbi. Her çiqas nêzdîbîyayîşî başî bibê zî yê ke xirab nêzdî bî estbî. Ma pêro negatîf û pozîtîfîyê xo ercna seba ke ma karêk baş bikerê. Xora derûdorê ma heme keye yê û doman û ciwan ê. Ma wazenê xo hîna rew biresnê înan. Sewbîna bi taybetî helwestê ma seba verê cinîyê ciwanan bidê tîya yo.”

 

‘Dersê ma do çarçewaya tedbîran de bêrê dayene’

 

Mamosteya resimî Neşe Toprake zî dîyar kerd ke înan girîngî daya serê cinîyê ke îmkanê înan kêm ê û wina vat: “Ma lazimîyê komeleyêk winasî de dî. Seba ke heta nika komeleyêka seba kultur û hunerî de bi taybetî seba cinîyan çinbi. Ma do beşê sey resim, tîyatro, muzîk, tembûr û tewir bi tewir beşan de dersanê xo bidê destpêkerdene. Ma waştêne çend mengî verê na komela abikerî labelê rewşêka îstîsna vejîya werte û prosesê pandemî dest pêkerdib. La ma do çarçewaya tedbîrê vîrûsê koronayî de dersanê xo bidê.”

 

Neşe tewr peyîn wina vat: “Ma do na komele de xebat û projeyê xo pêşkêş bikerê û qasê ke destê ma ra ame ma do hetê kultur û hunerî de xo biresnê cinîyan. Coka ma bendeyê keyeyanê ke domananê xo bierşawê kurs û sewbîna ma umîd kenê ke cinî beşdarê kursan bibê.”