MÊRDÎN - Mêrdîn de menga gulane  heta nika 8 cinî bi hawayêko guman dinyaya xo bedilnayî. Platformê Cinîyan ê Şahmaranî yê Mêrdînî derheqê babete de raporêk amade kerd. Aktîvîsta TJAyî Eylem Amake zî dîyar kerd ke hewl yeno dayene ke serê nê merdişan bêro girewtene.

 

Tirkîya de menga tebaxe de 27 cinî ameyî qetilkerdene û 23 cinî zî bi hawayêk guman dinyaya xo bedilnayî. Yew nê şaristanan ra tewr zêde merdişê ke biguman ci de ameyî ciwîyayîş Mêrdîn bi. Menga gulane de Mêrdînî de 8 cinîyan bi hawayêko guman dinyaya xo bedilna. Cinîya bi nameyê Melîha Kaya zî hetê camêrdek ra ameye qetilkerdene. Emrê cinîyê ke biguman dinyaya xo bedilnayî mabêne 20 û 30 de vuryeno. Derheqê merdişan de zî rewşê sey tedayê keye, bi zor zewicnayîş û şîdet vejeno werte. Tehqîqatan de pêwa îfade û raporê otopsî heta nika tu averşîyayîş nêvirazyayî û derheqê merdişan de heta nika kesêk zî nêameyo destbendkerdene. Aktîvîsta Tevgerê Cinîyê Azad (TJA) Eylem Amake, derheqê merdişî gumanan yê ke Mêrdîn û qezayê ci ameyê ciwîyayîş ercna.

 

Eyleme derheqê merdişê biguman yê cinîyan de wina vat: "Xeylê merdişî dewan de yenê ciwîyene. Xeylê xo cinîyê ciwanî yê nêzdîyê 20 serrî yê. Merdişê ke ameyê ciwîyayîş de serdayîşê ke ameyê kerdene de keyeyan îfadeyê seke, ‘problem çin bi çira bi?' ameyî xebitnayene. La wexto ke bihîrayî yeno cigêrayîş, vejêno meydan ke cinî bi şîdet û tedayan dir rî bi rî mendê. Cinî seba rayîrê çareserî nêvînenê, muracatê xokiştişî kenê."

 

'Seba çareserî ma xebityenê' 

 

Eyleme dewam de wina vat: "Xeylê sebebê merdişan bihîrayî nînê cigêrayîş. Dimayê raporê otopsî hedîseyê demvîyarte de verdenê. Îfadeyê keyeyan baş nêgînê. Heta nika ma nêeşnawito ke derheqê merdişan de tu kes ameyo destbendkerdene. Ma cinîyê TJA û cinîyê Mêrdînijî hewl danê ke sebebê merdişan cigêrayîş bikerê û çareserî bivînê."

 

'Ma raporan amade kenê' 

 

Platformê Cinîyê Şahmaran yê Mêrdînî zî derheqê merdişê biguman û qetilkerdişê cinîyan yê Mêrdînî de raporêk amade kerdê û nê zanayîşî pare kerdî: "Ma 2015 ra heta nika derheqê merdiş û întîxaran de raporan amade kenê. Ma do demêk kilm de nê raporî pare bikerê. Bi taybetî merdişê demê peyîn yê qezayan ameyê ciwîyayîş zî yenê verdayene. Seke întîxar kerdê ramojnenê û serê babete padanê. La tu kes bê sebeb peynîya cuya xo nêano. Tedayê keye û kalibê adetî yê cinîyan verbi merdişî beno. Ma sey platformî kewtê prosesêk newe û dimayê ke m rporê xo eşkera bikerê ma do vejîyê meydanan."

 

Cinîyê ke mengê peyîn de bi hawayêko guman dinyaya xo bedilnayî wina yê:  

 

"*Zehra Yalçin (55): 31ê gulane de dewa Giremira Nisêbînî bi guman dinyaya xo bedilna. Goreyê cigêrayîşî hîra, Zehra emro qij de ameya zewicnayene û bi serran şîdetî dir rî bi rî menda.

 

* Sebahat Oral: 1ê hezîrane de  Qoser de dinyaya xo bedilna.

 

* Şenaz Urun (19) 6ê hezîranê de Mîdyad de biguman dinyaya xo bedilna.

 

* Sare Gok (21): 21ê hezîrane de dewa Xanika ê Mîdyadî wexto ke verê pesî de bî, bi guman dinyaya xo bedilna. Raporê otopsî de vejîya meydan ke rêçê derbî bedenê ci de estê.

 

* Salîha Adsoy (44): 27ê hezîrane de dewa Xirbêkeblo ê Artukluyî de bîrê awe de cesedê ci ame vînayene.

 

* Berfîn Alça: 28ê temmuze de Qoser de biguman dinyaya xo bedilna.

 

* Fadîle Aslan: 15ê tebaxe de Qoser de biguman dinyaya xo bedilna. Ame zanayene ke zewacê bi merdimî dir Fadîle dir ame ferzkerdene.

 

* Kanîte Eraslan (20): 26ê tebaxe de Mîdyad de bi guman dinyaya xo bedilnaye.