Rojda Aydin

 

ŞIRNEX - Parlamentera HDPyî ya Şirnexî Nuran Îmîrî, derheqê şewatê daristanan ê herême de qisey kerde û dîyar kerd ke leşkerî bi hawayêk zanabîyayîş daristanê herême veşnenê û vat: "Bi şewatê daristanan wazenê welatîyê herême koçber bikerê. Wazenê dewê ke yenê veşnayene bêmerdim verdê. Vengdayîşê ma oyo ke şarê ma daristan û xozaya xo vejîyê."

 

Herêma Şirnexî de demê peyîn de şewatê daristanan her ke şono pîl beno. Koyê Cudî, Gabar, Bagok û herêma Bestayî bi mengan o dimayê , operasyonê leşkerî daristanî yenê veşnayene. Daristanê ke yenê veşnayene ne leşker û ne zî kesê berpirsyarî nêtefnenê û destûr nêdanê ke welatî zî şêrê nê şewatî bitefnê. Seba ke şewat ra heta nika xeylê darî, zîyanî û baxçeyî veyşayî. Sewbîna heto bîn ra zî darê herême bi destê qorîcîyan yenê birnayene. Heta nika bi hezaran darî ameyê birnayene. Derheqê şewatê Daristanan de Parlamentera Partîya Demokratîkî ya Şaran (HDP) ya Şirnexî Nuran Îmîre qisye kerde.

 

'Ma nêeşkenê bêveng bimanê'

 

Nurane dîyar kerd ke operasyonê ke Başur de yenê kerdene zî girêdayê nê şerê lêşinî yê û wina vat: "Kurdistan de xeylê cayî sey herêmê taybet ameyî îlankerdene û seba xo kerdê herêmê tampon.  Bi pêameyîşê îdareyê Başurî dir hêzê Tirkîya herêe de bi ca bîyê. Uca de zî daristanî yenê veşnayene û welatî yenê koçkerdene û verê înan danê welatê xerîban. No zî parçeyêko çinkerdişê xozaya kurdan o. Bi tena menga Hezîrane de Şirnex de 10 rey şewat vejîya. Şewatê daristanan girêdayê şerê hemverê bîyayîşê kurdan o. Wexto ke merdim ci ra ewnîyeno, pêro koyanê Kurdistanî de qereqol ameyî awankerdêne. Dimayê şerî û 2014an de bajaran de xeylê qereqol ameyê awankerdene û hêzê mîlîtarîst bi ca bîyê. Seba operasyonan çi yeno vernîya înan, hemine îmha kenê. Merdim bi xoza eşkeno biciwîyo. Senîn kiştişê merdimêke hemverê merdimayî yo, destdergkerdişê hemverê xoza zî parçeyêk nê qirkerdişî yo. Hemverê nê qetilkerdişî ma nêeşkenê bêveng bimanê."

 

'Tena botan nîno veşnayene'

 

Nurane dîyar kerd ke seba şewatê daristanan waştê selahîyetdaran dir pêvînayîş bikerê û muxatap nêameyê girewtene û wina vat: "Koyê Cudî de, rojê derbasbîyayîşî de şewat vejîya û 3 rojan dewam kerd. Eynî wextî de no şewat tena Botan de çin o. Çar parçeyê Kurdistanî de şewatê daristanan esto û serê şarê Kurdî de hêrişêk bêhempa yeno kerdene. Hêrişê goristanan zî kenê.

 

'Wayîrê xozaya xo vejîyê'

 

Nurane tewr peyîn wina vat: "Senîn ke ma ziwan, nasname û kulturê xo pawenê, ganî ma wayîrê xozaya xo zî vejîyê. Welatê ma cinet o. Ma do hemverê şewatan vejîyê. Ma do wayîrê xozaya xo vejîyê. Wexto ke dar û daristanî yenê veşnayene kezabama zî ci dir yena veşnayene. Şewato ke xozaya Kurdistanî her ke şono pîl beno. Bi hêzê xo yê mîlîtarîst cayê ke nêeşkenê biveşnê zî daran birnenê û roşenê. Ma vanê destê xo medê xozaya ma."