Şehrîban Abî

 

WAN - Zehra Gomula ke emro qij de ameye zewicnayene, dîyar kerd ke wexto ke înan gîştane kerdê engişte ci vata belkî dîyarîya dedê ci ya û vat: “Ez bi domananê xo dir pîl bîya. Ganî hemverê zewaco emrê qij de têkoşîn bêro kerdene.”

 

Yew heto tewr girîng ê hêrişê cinsî yê hemverê domanan, zewacê emrê qijî de yo. Rêxistin û aktîvîstê heqê cinî û domanan hemverê nê têkoşîn kenê û pêwa nê hema zî problemêk girîng ê komelî yo. Goreyê dayeyê 2019î yê Sazgehê Îstatîstîkê Tirkîya (TUÎK), di emrê qijî de zewicnayîş; 17 hezar û 47 o. Nê dayeyî welat ra sera 3,1 derbasê qeydan bîyo.

 

Zehra Gomule emrê qij de zewicnayî. Nika 43 serrî ya. Zehra dewa Vurganîsî ya Westanê Wanî de ciwîyena. Zehra wina vat: “Ez tay bi şans bîya. Heta ke camêrdo ke mi ey dir nîşan kerdî, leşkerî ra ame hîn pîl bîbîya. La reyna zî seba zewacî zaf qij bîya. La qet nêbo 11 serrî nêbîya. Ez şîya serê çemî. Ez ameya keye, birayê mi gîştane kerd engişta mi. Mi vat, belkî dedê mi dîyarîya mi keno. Ez kêfweş bibîya. La wexto ke ez ameya keye dayîka mi bermayîne. Mi pers kerd gelo se bîyo, o wext va ke ti êdî bi nîşan a. Ez şaş menda. O wext pîyê merdimî bi vatêne çi o bi. Kes çîyêk nêkerdêne. Êdî waşteyê mi bi, labelê embazê mi teber de kay kerdêne.”

 

‘Ez nêeşkayîne şêrî teber’

 

Zehra tewr peyîn dîyar kerd ke emrê qijî de zaf rastê zor û zehmetîyan ameya û vat: “Ez bi domananê xo dir pîl bîya. Emro qij de ez ameya nîşankerdene, seba nê ez nêeşkayîne vejî teber. Vatêne, ‘şerm o, tu êdî zewicnayîya, mevejî teber.’ Emrê domanî de mecbûr menda ke bi camêrdêk dir cuya xo dewam bikerî. Çi beno wa bibo dayîk û pî, domananê xo emrê qijî de nêzewicnê.”