Rojda Seyidxan

 

QAMIŞLO - Hetê Weqfê Cinîyê Azadî ra Dêrik de seba cinîyan, perwerdeyê mûsnayîşê deştişî ame destpêkerdene. Semîha Hisêna ke mamostetî kena, dîyar kerd ke tîya cinî karêk mûsenê û derûdorê xo rê zî ramojnenê. Nadîya Elî ya ke beşdarê perwerde bîya vat: "Bi xebatê wina, ma eşkenê debara keyeyê xo zî bikerê.”

 

Vakur û Rojhelatê Sûrîye de pêwa averşîyayîşê sîyasî, hetê ekonomî de zî averşîyayîş yeno kerdene. Weqfê Cinîyê Azadî yê şaristanê Dêrikîyê Kantonê Qamişlo, seba cinîyê şaristanijan xebatê tewir bi tewir kerdî. Nînan ra yew zî xebata perwerdeyê deştişê cilan a. No perwerde 12 cinîyan ra yeno meydan, tîya de cinî mûsayîşê heme metodê deştişê cil û belgan vînenê. Perwerde do 45 rojan dewam bikero. Derheqê babete de cinîyê ke beşdarê perwerdeyî bîyê ercnayîş kerdî.

 

‘Wa hewceyê tu kesî nêbê’

 

Mamoste Semîha Hisêne serê girîngiyê perwerdeyê deştişî de vinderte û vat: "Bi hetkarîya Weqfê Cinîyê Azadî ma no perwerde bi cinîyê şaristanijan dir dest pêkerd. Heta nika ma xeylê babetan de seba cinîyan perwerde da dest pêkerdene. Ma wazenê ke cinî pêro xebetan bimûsê û cuya xo de averşîyayîşêk awan bikerê. Wa cinî hewceyê tu kesî nêbê. Cinîyê ke beşdarê perwerde bîyê, kêm bo zî serê deştişî de fikrêk înan esto. Cinîyê ke tîya mûsenê, eşkenê teber de derûdorê xo rê zî ramojnê. Amancê ma oyo ke na babete de cinî bibo wayîrê meslegî û xo bi xo cuya xo rayîra bero.”

 

‘Cinî do her wext serkewte bibê’

 

Nadiya Elîye zî beşdarê perwerdeyê deştişê bîya û wina vat: “Bi di hewteyo ke ez beşdarê perwerde bîya. No perwerde seba ma zaf baş o, nika zî ma eşkenê xo bi xo projeyêk qij abikerê û debara keyeyê xo bikerê. Makîneyê mi keye de esto û ez fikrîyena ke cîrananê xo rê zî ramojnî. Cinî kam ci xebate de bo, do serkewte bibo.”