WAN - Krîzê ekonomî her ke şono giran beno û welatîyê ke şonê bazaran zî destveng agêrenê. Welatîyê ke Wan de yê dîyar kerdî ke bi yew poşet agêrenê keyeyê xo.

 

Krîzê ekonomî her ke şono giran beno. Vatişê hukmatî yê derheqê averşîyayîşê ekonomî û sewbîna sozê ke danê zî şar êdî bawer nêkeno. Tewr peyîn wezîrê Xezîne û Ekonomî Berat Albayrakî vatib, ‘do demêko nêzdî xe xo kom bikerê û do komel bi hawayêko cidî no hîs bikero.’ Serê medyaya komelî de zî bi vatişê sey, ‘oyo ke ma hîs kenê krîz, feqîrî û kaos o’ reaksîyon amebi ramojnayene. Qezaya Îpekyolu ya Wanî de taxa Karşiyaka de cinîyê ke ameybî bazarê Îne derheqê krîzî de ercnayîş kerdî. Cinîyan dîyar kerdî ke bi poşetêk agêrênê keye û  esnafan zî vat, rojê xo xelas kenê.

 

‘Ma nêeşkenê fatureyan bidê’

  

Cinîya bi nameyê Azîze Ozkaçmaza ke dîyar kerd ke ciwîyayîş zehmet o, debarkerdiş zehmet o û wina vat: “Bazar de hema zî sebze vayo. Seba nê krîzî ciwîyayîş zehmet o. Mi emsar seba zimistanî çîyêk amade nêkerd. Pêwa nufusê ma kêm o zî ma bi zor debara xo kenê. Keye ê min o, la ma bi zor fatureyan danê.”

 

Zînnet Cengîze zî dîyar kerd ke bi 10 TL ameya bazar û vat: “Mi çîyêk nêgirewt. Ne meaşê mi esto, ne zî keyeyê ma de kesêk xebityeno. Seba nê ez nêeşkena çîyêk zî bigîrî. Ma bi zor derbaz kenê.”

 

‘Mi heta şan de tena 10 qedeh gilgil rot’

 

Zeynep Karaca zî dîyar kerd ke 4 serrî yo seba debara xo gilgil roşena û wina vat: “Krîz tesîr serê her ca de kerd. Şar zehmetî anceno. Eke keye de kesêk tena bixebityo zehmet o. Mi seba debara xo bazar de dest bi kar kerd. Vernê de reaksîyono cîya bî. Mi zî seba nanê xo, têkoşînê xo dewam kerd. Heta şan de qezencê mi 30 TL yo. Tena 10 qedeh eşkena biroşî.”

 

Asya Orhana ke amebî cayê dayîş û girewtişî, va ke tena eşofmanêke eşkeya bigîro û vat, her serre amadekarîya zimistanî kerdêne la emsar qet sebze nêgirewta û amadekarî zî nêkerda.