AMED - Cinîyê Amedijî reaksîyon vera hêrişê karkeranê kurdî Sakarya dayî û vat: "Ma nê nêheqê qebûl nêkenê ganî kurdî hemverê nê hêrişê nîjadperestî bêveng nêmanê, reaksîyonê serê medyaya komelî zî qîm nêkenê, ganî wareyan de reaksîyonê xo bîyarê ziwan."

 

Qezaya Şemrexî ya Mêrdînî 16 karkerê mewsîmî seba findiqan berardiş bikerê 4ê Êlûle de şîbî Sakarya. Wayîrê kar û dewijan vera karkerê kurdî hêrişê nîjadperestî kerdib. Karkerê kurdî dimayê hêrişê  nîjadperestî ageyrabî Mêrdînê. Walîyê Sakarya zî eşkerayî dabî û vatibî ke hêriş babetêke kesî yo û tu eleqeyê ci  bi kurdbîyayîş û tirkbîyayîşî çin o. Dimayê ke dîmenî ameyî parekerdişê reaksîyonê hemverê hêrişî dewam kenê. Cinîyê Amedî zî reaksîyonê xo yê serê nê hêrişê nîjadperestî ardî ziwan.

 

'Wa Kurdî serê herra xo bixebityê' 

 

Gulsum Bakire: Wa Kurdî nêşêrê bajarê tirkan. Wa bajarê xo de bimanê. Gama tirkî ameyê bajarê ma, ma kurdî înan zaf baş pêşwazî kenê labelê gama kurdî şonê uca rastê hêrişê nîjadperestî yenê. Ganî kurdê ma serê herra xo de bixebityê û herra xo û bîyayîşê xo wayîr vejîyê.

 

'Ez nê hêrişan şermezar kena'  

 

Cinîya ke nêweşt nameyê xo û peynameyê xo vajo wina vat: "Ez sey cinîyêka kurde nê hêrişan şermezar kena. Xora cinîyê ma hetê camêrdan ra bi şîdet û kiştişê dir rî bi rî yenê. Hetê Rojawayê Tirkîya de zî no hêrişê nîjadperestî serê cinîyê kurdî de, rewşêke şermezar kerdî û rexnekerdişî yê. Ganî ma kurdî hemverê nê caardişan vindertişêko xurt ramojnê. Eke ma bêveng bimanê do her wext nê hêrişî dewam bê û reyna bibê. Seba nê zî ganî ma vengê xo berz bikerê û bi no hawayî wayîrê cinî û şarê xo vejîyê.

 

'Reaksîyonê serê medyaya komelî qîm nêkenê'

 

Beyza Canli: Mi nêeşka temamê dîmenî temaşe bikerî. Mi da vindarnayîş seba ke zerrîya mi zaf deja. Ameyî serê merdiman û 'deneyê komelî' yê merdimbîyayîşî kerdî û cayê xo de zî bi hawayê nîjadperestî hêrişê  kurdan kenê. No dirîtî yo. Bi rastî zî merdim xemgîn beno. Ez sey cinîyêk hemverê her tewir şîdetê serê cinîyan vindena. Ma nê welatî de ciwîyenê la sey ke ma nê welatî de nêbê nêzdî benê. Ma tu çîyêke serê medyaya komelî de nêeşkenê bişiknê. Goreyê mi reaksîyonê serê medyaya komelî de ganî bireso kuçeyan. Sewbîna ganî no nîjadperestî werte ra wedarnê.

 

'Ma nê caardişan qebûl nêkerê' 

 

Zozan Çîçek: Sebebê hêrişê zêde nêzana la qetî seba kurdbîyayîşê înan hêrişê kerdê. No nîno qebûlkerdene. Tehemûlê înan bîyayîşê kurdan rê nêmendo û ganî ma kurdî zî hemverê hêrişê bi nê rengî reyna nêbê, ganî ma wayîrê vindertişî bê û ma nê caardişan qebûl nêkenê."

 

'Ganî ma bîyayîşê xo rê wayîr vejîyê'

 

Fatîme Kara: Ez kurd a û serê şarê Kurdî zulmêko pîl yeno kerdene. Ganî ma bîyayîşê xo bipawê û hemverê zulmê ke karkerê kurdan rê Sakarya de ame kerdene bêveng memanê.

 

Cinîya ke nêweşt nameyê xo bida wina vat: "Gama ke mi nê dîmenî dî ez şaş menda. Eke tirkî ma rê wina bikerê, ganî ma helwestê xo ramojnê û bêveng nêmanê. Hem vanê, 'ma wayê û bira yê' û hem zî nîjadperestî kenê. Ma nê qebul nêkenê.