Fîlîz Zeyrek

 

EDENE - Hasret Bahdira ke bi serran o bi pakkerdişê gozan debara xo kena, bi pereyê ke qezenc kena ewnîyena hîrê domananê xo yê ke zîndan de yê. Yewin waştişê Hasrete oyo ke domanê aye azad bibê û ageyro serê herra xo.

 

Hasret Bahadire û keyeyê xo 40 serrî verê seba problemê ekonomîye, Bedlîs ra koçê Edene kerdî. Hasrete û keyeyê xo taxa Şakîrpaşayê Seyhanê Edenî de bi ca bî û têkoşînêk ciwîyayîşî yê zehmet seba înan dest pêkerd. Hasrete dîyar kerd ke wareyê înan baxçe, rezê înan estbî û vat, Edene de zî bi tedayan dir ameyî rî bi rî.

 

Hasrete wina vat: "Vatî Edene de kar esto, ma zî 40 serrî verê ameyî tîya. A roje ra ma xebityenê. Bajarê ma de erdê ma estbî, la ma uca terk kerd û ma ameyî tîya. Ma tîya zî mîyanê feqîrî de mendî. Werrekna îmkanî bibayîne, ma şaristanê xo de biciwîyayîne. Çi heyf çin o. Ma tena seba serdayîşî şinê keyeyê merdimanê xo. O zî seba ma baş o."

 

Hasreta ke 8 domanê aye estê, 5 kênayê aye zewicnaye yê, Hasrete bi mêrdeyê xo dir têkoşînê ciwîyayîşî dana, bi şiknayîş û pakkerdişê gozan debara xo kena.

 

'Ez heqdestê keda xo tam nêgîna'

 

Hasrete dîyar kerd ke qutîya gozan bi 15 TL pak kena û wina vat: "Ma pak kenê û ma kenê la ro. Vayîya gozan yena 25 TL. Karêko zehmet o. Ma heqdestê keda xo nêgînê. Hîrê lajê mi tepişte yê. Ez wina ewnîyena înan ra. Her roje heta şan de ez xebityena. Roje esta qutîyêk roje esta ez di qutîyan pak kena. Heta nîmeyê şewe xebityena. Paşta mi dejena. Reyan kênaya mi yena hetkarîya mi. Reyan cîranî. Bi hawayêk pereyê xo qezenc kena."