AMED - Delal Ozkana ke bi viraştişê nanê tenûre debara xo kena, keyeyê xo yê 9 kesî rê ewnîyena. Delale va, seba krîzê ekonomî domanê aye kar nêvînenê û va, aye cuyêka tewr baş wazena.

 

Bi hezaran cinîyê ke emrê qijî de yenê zewicnayene, rastê xeylê zehmetîyan yenê. Delal Ozkane zî yew a cinîyan ra ya û seba restoranêke nanê tenûre viraznena. Bi pereyê tîya qezenc kena, ewnîyena keyeyê xo ra.

 

Delale ke bi viraştişê nanê tenûre qezencê xo kena, binê germî de bi saetan vindena. Germê tenûre û germê Amedî zî zêde beno. Delala ke ma şî serdayîşê aye, areqê xo pak kerd û destbi kilmî hîkayeya xo qalî kerd.

 

Delale hema qij bîya, pîyê xo vindî kerda, dayîka aye zî bi zor bi kesêk bîn dir zewicnayene. Delale bi serran o dayîka xo nêvînena. Heta 14 serrî verê bapîrê xo de manena û dima ra bi lez û bez zewicnenê 15 serrî xo ya bena dayîk.

 

'Domanê mi betal ê'

 

Delale dayîka 8 domanan a û wina va: "Mêrdeyê mi çend serrî verê merd. Wexto ke mêrdeyê mi, sax bi zî ez xebityena. Mi çape kerdêne, peme arêdayîne, mi berardişê destan viraştêne û rotêne. 6 mengan de şaredarî de xebityaya. Mi sebze û fêkî rotî. Karê nika zî zehmet o la ez mecbûr a bikerî. Eke domanê mi bixebityayîne, ez o nêameyîne tîya. Kar çin o ke domanê mi bixebityê. 5 domanê mi yê emrê xebate estê. La sektorê înşatî vinderto û kes nêxebityeno. Ez çuwalêk ardanî 130 TL gêna. Çend rey nan viraznena, qedêno. Her çî vayê. Krîz esto. Debare zehmet a."

 

'Dimayê 4 domanan mi nasname vet'

 

Delale vat, aye bi serran o bê nasname ciwîyaya, dimayê ke 4 domanê ci benê nasname veta û wina va: "Coka mehrê mi fermî çinbi. Pîyê mi merdib û mi nêzanibi dayîka mi ça de ya. Coka nasnameyê mi zî nêvejîyayîne. Ez şîya dadgehe seba nasname vejîyê, vatî ke ganî keye ra yew bêro. Dimayê 4 domanê mi nasnameyê xo vet. Ez nika seba xo û domananê xo cuyêka baş wazena. Seba domananê xo kar wazena."