MÊRDÎN - Hemsereka SESî ya Mêrdînî Şukran Guzele bale ante serê hûmara kesê ke Mêrdîn de bi Vîrusê Koronayî kewtê û vat, problemê welatî zî serê şarî de ameyo barkerdene.

 

Tirkîya de rîyê vîrusê Koronayî ra hûmara kesê ke mirenê her ke şina zêde bena. 10ê Adare de vîrus vejîyabi werte û hîn sînorî ameybî dayene. La 1ê hezîrane de prosesê normalbîyayîşî ame destpêkerdene bi nê dir zî xeylê şaristanan de hûmare zêde bî. Înan ra yew zî Mêrdîn bi.

 

Şaristan de her roje bi pêroyî 350 kesî reyde vîrus yeno tespîtkerdene û heta nika şaristan de 400 zêdêr xebatkarê weşîye enfekte bîyê. Bi nê prosesî dir nêweşxaneyê beşê giran de zî ca nêmend. Hemsereka SESî ya Mêrdînî Şukran Guzele dîyar kerd ke nê prosesî de psîkolojîyê şarî û xebatkarê weşîye xira bîyo.

 

‘Nêweşxane ra erşawenê keye’

 

Şukrane dîyar kerd ke hûmara rojane zaf zêde bîya û va: “Mêrdîn de dimayê 1ê hezîrane ra dima şaristanê herême de hûmare bi hawayêko cidî zêde bîya. Goreyê dayeyê nika ma bi dest kerdê roje ra 300-350 pozîtîf vejênê. Hem nêweşxaneyê merkez û hem zî yê qeza de beşê giran pirr bîyê. Xeylê nêweşê pozîtîf zî nêweşxaneyan ra agêrenê û keyeyê înan de derman kenê.”

 

‘400 ra zêdêr xebatkarî enfekte bî’

 

Şukrane dewam de ard ziwan ke mudirîyê weşîye ê şaristanî zanayîşan pate nêkeno û wina va: “Pêwa nê unîteyê giranan de ca nêmendo û semedo ke ca çin o, xeylê xo erşawenê keye û êyê ke rewşa înan giran a zî wexto ke ca nêweşxane de veng beno eşkenê tedawî bivînê. Hetê fermî de zanayîşêk nîno parekerdene. Nika şaristan de verê hûmara merdişan de hûmarek çin a. Bibo zî ma dir nîno parekerdene. Nika zî şaristan de 400 ra zêdeyêr xebatkarê weşîye enfekte bîyê.”

 

‘Problem serê şarî de ameyo barkerdene’

 

Şukrane veng da ke ganî welatî hîna zaf bi tedbîr têbigeyrê û wina va: “Şarî ra vanê maske bi xebitnê û hîjyen rê baldar bê. La nêweşî bi kesê bînan dir yenê têhet û welatîyê ke ganî karantîna de bê, seba problemê komelî û ekonomîye nêeşkenê bikewê karantîna. Ganî şar asayîşê xo bigîro û temasan rê baldar bê. Hukmat semedê welatîyê ke karantîna de yê zî ganî hetê ekonomî de paştdayîş bidê.”